नेपालमा प्राविधिक र व्यावसायिक शिक्षाको गुणस्तर बढाउन स्विट्जरल्याण्डको झण्डै १ अर्ब सहयोग
प्रकाशित मिति : श्रावण १८, २०७९ बुधबार
आज नेपाल सरकार अर्थ मन्त्रालय र नेपालस्थित स्विट्जरल्याण्डको राजदूतावास मार्फत स्विट्जरल्याण्ड सरकारबीच नयाँ प्राविधिक र व्यावसायिक शिक्षा तथा तालिम परियोजना कार्यान्वयनका लागि झण्डै १ अर्ब रुपैयाको अनुदान सम्झौतामा हस्ताक्षर भएको छ ।
क्वालिटी परियोजनाको समग्र उद्देश्य नेपाली युवाहरूले गुणस्तरीय प्राविधिक र व्यावसायिक शिक्षा तथा तालिमबाट लाभान्वित हुनु र राम्रो रोजगारीका सम्भावनाहरू सुनिश्चित गर्नु रहेको छ । यस परियोजनाले सरकारका तीनवटै क्षेत्र र विशेषगरी प्रदेश सरकारहरूलाई संविधानमा व्यवस्था भएबमोजिमको संवैधानिक कार्यादेश कार्यान्वयन गर्न सहयोग गर्ने जनाइएको छ ।
शिक्षा, विज्ञान तथा प्रविधि मन्त्रालय र प्राविधिक तथा व्यावसायिक, शिक्षा तथा तालिम परिषद्सँगको सहकार्यमा यो परियोजना सातवटै प्रदेशमा स्थानीय सरकारको कम्तिमा २५ प्रतिशत समेट्ने गरी कार्यान्वयन गरिने जनाइएको छ । यस परियोजनाले १ हजार प्रशिक्षकहरूलाई तालिम र इजाजतपत्र प्रदान गर्नका लागि सघाउनुका साथै नेपालभरका २५० प्राविधिक र व्यावसायिक शिक्षा तथा तालिम विद्यालयहरूलाई गुणस्तरीय कार्यसम्पादनका लागि सघाउनेछ । आयोजनाबाट कूल ५० हजार नेपाली लाभान्वित हुने अपेक्षा गरिएको छ ।
अर्थ मन्त्रालयका सहसचिव ईश्वरीप्रसाद अर्याल र नेपालका लागि स्वीस राजदूत एलिजाबेथ भोन क्यापलरले सम्झौतामा हस्ताक्षर तथा आदानप्रदान गरेका हुन् । हस्ताक्षरपछि प्रतिक्रिया दिँदै अर्थ मन्त्रालयका सहसचिव अर्यालले गुणस्तरीय प्राविधिक शिक्षाबाट नेपाली युवालाई लाभान्वित गर्न र राम्रो रोजगारीको सम्भावना र देशको सामाजिक–आर्थिक विकासका लागि यो परियोजनाको कार्यान्वयन महत्वपूर्ण रहेको बताए । अर्यालले नेपालमा स्विस सहयोगबाट सम्पन्न भएको विकास सहयोगबारे पनि जानकारी गराए ।
त्यसैगरी राजदूत एलिजाबेथ भोन क्यापलरले नेपालमा प्राविधिक र व्यावसायिक शिक्षा तथा तालिमलाई आर्थिक वृद्धि र सामाजिक समावेशीकरणको महत्वपूर्ण औजारको रूपमा मान्यता दिएको कुरामा जोड दिइन् । प्राविधिक र व्यावसायिक शिक्षा तथा तालिम विद्यालयहरूको कार्यसम्पादनले निजी क्षेत्रको उत्पादकत्व वृद्धि र देशको सामाजिक आर्थिक वृद्धिमा योगदान गर्नसक्ने उच्च गुणस्तरको प्राविधिक र व्यावसायिक शिक्षा तथा तालिम प्राप्त व्यक्ति उत्पादन गर्नुपर्ने बताइन् ।
नेपालको सामाजिक आर्थिक विकास र मानव संसाधनको विकासमा स्विट्जरल्यान्ड सरकारको अतुलनीय सहयोगको लागि नेपाल सरकारले हार्दिक आभार प्रकट गरेको छ । दुबै सरकारहरूले साझेदारीबाट सफलताहरू मिलेको स्वीकार गर्दै र बलियो सहयोग जारी राख्न तत्परता व्यक्त गरेका छन्।