न्युयोर्कमा रिँगटा लागेर ढलेका तीन छोराछोरीका पिता मल्लको ब्रेनडेड, सहयोगको अपिल
प्रकाशित मिति : बैशाख २१, २०८१ शुक्रबार
अमेरिकाको न्युयोर्कमा बस्दै आएका ४३ बर्षीय लक्ष्मण बहादुर मल्लको ब्रेनडेड भएको छ । नेपालको पर्वत जिल्ला मोदी गाउँपालिका ६,गिजानका मल्ल गत आइतबार एक्कासी रिँगटा लागेर भुइँमा ढलेपछि अस्पताल भर्ना गरिएको थियो ।
उनलाई साउथसाइड अस्पतालको आकस्मिक कक्षमा लगिएको थियो । त्यसपछि उनलाई भेन्टिलेटरमा राखिएको र उनको ब्रेनडेड भइसकेको अस्पतालले जानकारी दिएको छ ।
गतबर्ष अनेकौं चुनौती र कठिनाइ पार गर्दै अमेरिकाको न्युयोर्क आइपुगेका मल्लले एसाइलममार्फत अमेरिकाको बसोबास प्रावधान मिलाउँदै थिए । उनकी श्रीमति ३८ बर्षीया सजिता लामिछाने मल्ल, छोरीहरु २० बर्षीया सभीयाता मल्ल, १७ बर्षीया दिव्यता मल्ल र छोरा १२ बर्षीय दीप्सन मल्ल नेपालमा रहेका छन् ।
परिवारका सदस्यहरू बिक्षप्त अवस्थामा रहेको तथा परिवारको एकमात्र सहाराको रूपमा मल्लले भूमिका निर्वाह गर्दै आएको उल्लेख गर्दै सहयोग संकलनका लागि गोफण्डमी सुरु गरिएको छ ।
तपाईपनि सहयोग गर्न चाहनुहुन्छ भने यहाँ क्लीक गर्नुहोला ।
अस्पतालले पार्थिव शरीर प्राप्त गर्नको लागि परिवारको सदस्यको खोजी गरेकाले श्रीमती र जेठी छोरीको अमेरिका आउने भिसा प्रकृया सुरु गरिएको छ । आर्थिक स्थीति कमजोर रहेकाले परिवारका सदस्य नेपालबाट आउने जाने खर्च लगायत अन्तिम संस्कारको खर्च जुटाउन सहयोगको अपेक्षा गर्दै गोफण्डमी सुरु गरिएको प्रकाश शर्माले जानकारी दिएका छन् ।
३० हजार डलरको लक्ष्यसहित पर्वत सेवा समाज न्युयोर्कको तर्फबाट सुरु गरिएको गोफण्डमीमा सहयोगका लागि सबैसँग अनुरोध गरिएको छ ।