Follow @khasokhasmag

अमेरिका निवासी नेपाली मूलका कलाकार जसवन्त देव श्रेष्ठले जिते एमी अवार्ड, रचियो इतिहास


प्रकाशित मिति : असार ५, २०७९ आईतबार

अमेरिका निवासी नेपाली मूलका कलाकार जसवन्त देव श्रेष्ठले पहिलो नेपाली चलचित्र निर्माताका रुपमा प्यासेफिक साउथवेष्ट एमी अवार्ड जितेर इतिहास रच्न सफल भएका छन् । उनले सरस्वती पूजा नामको सांस्कृतिक बृत्तचित्रबाट एमी अवार्ड जित्न सफल भएका हुन् ।

अहिलेसम्म उनका श्रृजनाहरु ९ पटक एमी अवार्डको नोमिनेशनमा परेका थिए । तर यसपटक भने अवार्ड जित्नमा सफलता मिलेको हो । अवार्ड जितेपछि श्रेष्ठले नेपाल र नेपाली संस्कृतिको प्रतिनिधित्व गर्न पाउनु आफ्ना लागि गौरवकको कुरा भएको बताए ।

यसपटक उनका ३ बृत्तचित्रहरु एमी अवार्डको नोमिनेशनमा परेका थिए । क्यालिफोर्नियाको पाल्म स्प्रींगमा आयोजित ४८ औं वार्षिक प्यासिफिक साउथवेस्ट एमी अवार्डको धर्म शीर्षकको उत्कृष्ट वृत्तचित्रका लागि श्रेष्ठका तीनवटा बृत्तचित्रहरु नोमिनेशनमा परेका थिए ।

फेस्टिभल्स श्रृंखलाबाट दशैं पर्व, सरस्वती पूजा पर्व र महा शिवरात्री पर्व नामका उनका बृत्तचित्रहरु नोमिनेशनमा परेका थिए । फेस्टिभल्स श्रेष्ठबाट निर्मित ५ भागको बृत्तचित्र श्रृङ्खला हो जसले दैवी प्रेरित रहस्यमय संस्कृति र नेपाली जनताको विविधताको अनुभवका साथमा नेपालको मिथक, किंवदन्ती र पुरातन परम्पराहरूलाई उजागर गरेको छ ।

फेस्टिभल शृङ्खलामा प्रेमपूर्ण परिश्रम रहेको र यसलाई बनाउन तीन वर्ष लागेको श्रेष्ठको भनाई छ । दर्शकहरु बृत्तचित्रको माध्यमबाट भर्चुअल रुपमा नेपालको यात्रामा जानसक्ने र नेपालको समृद्ध संस्कृतिको बारेमा केही भएपनि जान्न सक्ने श्रेष्ठले बताए ।

यो बृत्तचित्र हेरेपछि उनीहरुले नेपाललाई भ्रमणका लागि गन्तव्य बनाउने निर्णय गर्न सक्ने र त्यसले गर्दा नेपालको पर्यटन उद्योगलाई निसंन्देह मद्दत गर्ने श्रेष्ठको विश्वास रहेको छ ।

श्रेष्ठको यो बृत्तचित्र विश्वचर्चित डिस्कभरी च्यानलले प्रिमियर गरेको थियो । अमेरिकाको लस एन्जलसमा रहेको क्रियटिभ हाइट्स इन्टरटेन्मेन्टको ब्यानरमा निर्माण गरिएको यो बृत्तचित्र १७ वटा एसियाली मुलुकमा प्रशारण गरिएको थियो । यही कम्पनीको ब्यानरमा निर्मित सामाग्रीहरुले विभिन्न अवार्डहरु जित्न सफल भएका छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com