ट्वीटरको सबै सेयर किन्ने तयारीमा एलन मस्क,भने ‘निजी कम्पनीको रूपमा रुपान्तरण गर्न आवश्यक छ’
प्रकाशित मिति : बैशाख १, २०७९ बिहीबार
अमेरिकी धनाढ्य एलन मस्कले ट्वीटरको सम्पूर्ण सेयर किन्ने तयारी गरेका छन् । उनले अमेरिकी माइक्रो ब्लगिङ सामाजिक सञ्जाल ट्वीटर किन्न इच्छा व्यक्त गरेका हुन् । मस्क यतिबेला पनि ट्वीटरका सेयर होल्डर हुन् ।
उनले कम्पनीको सेयर प्रतिकित्ता ५४.२० अमेरिकी डलर मूल्यांकन गरेका छन् । यसअनुसार ट्वीटरको सबै सेयर किन्न उनले कम्पनीलाई ४३।४ बिलियन अमेरिकी डलरको अफर पठाएका छन् । यो अप्रिल १ मा बन्द भएको कम्पनीको सेयर मूल्यभन्दा ३८ प्रतिशतले बढी हो ।
‘ट्वीटरको सबै सेयर किन्न गरेको यो अफर उत्कृष्ट र अन्तिम अफर हो,’ मस्कले भनेका छन्, ‘यदि यो स्वीकार गरिएन भने सेयर होल्डरको रूपमा मैले मेरो स्थिति पुनर्विचार गर्नुपर्छ ।’ मस्कले ट्वीटरका प्रतिनिधिलाई बुधबार नै यो अफर पठाएका थिए ।
मस्कले कम्पनीको सबै सेयर किन्ने पत्र कम्पनीका प्रमुख कार्यकारी अधिकृत पराग अग्रवाललाई नभई बोर्ड अध्यक्ष ब्रेट टेलरलाई सम्बोधन गरिएको छ ।
‘मैले ट्वीटरमा लगानी गरे किनकी यसमा विश्वभर स्वतन्त्र अभिव्यक्तिको माध्यम बन्ने क्षमता छ,’ मस्कले भनेका छन्, ‘मैले लगानी गरेपछि यसलाई निजी कम्पनीको रूपमा रुपान्तरण गर्न आवश्यक छ ।’