ग्रिनकार्ड र नागरिकता लगायत प्राय आवेदनमा २ देखि ६ महिनाभित्र निर्णय दिने युएससीआईएसबाट लक्ष्य तय
प्रकाशित मिति : चैत्र १५, २०७८ मंगलबार
अमेरिकी सरकारको युएससीआईएसले ग्रिनकार्ड र नागरिकता लगायतका प्राय सबै आवेदनमा ६ महिनाभित्र निर्णय दिने लक्ष्य तय गरेको छ । अध्यागमनबारेका आवेदनमा चर्को ब्याकलग र निर्णय दिनमा लामो समय लागिरहेको अवस्थामा युएससीआईएसले यस्तो लक्ष्यको घोषणा गरेको हो ।
आर्थिक बर्ष २०२३ को अन्तिम सम्ममा यो लक्ष्य पूरा गर्ने युएससीआईएसले घोषणा गरेको छ । लक्ष्य पूरा गर्नका लागि क्षमता, प्रविधि र कर्मचारीमा विस्तार गर्ने युएससीआईएसले जनाएको छ । कोरोनाको महामारीका कारण ग्रिनकार्ड लगायतका कैयन आवेदनमा युएससीआईएसले निकै लामो समय लगाउँदै आएको छ ।
एकबर्षभित्र वर्क परमिट नविकरण गर्न नसकेको अवस्थामा युएससीआईएसले अब वर्क परमिटबारेको निर्णय ३ महिनामा दिने लक्ष्य तय गरेको छ । त्यस्तै एड्भान्स परोल र गैर आप्रवासी भिसा थप वा परिवर्तनको निर्णय पनि ३ महिनामा दिने लक्ष्य युएससीआईएसले तय गरेको छ ।
ग्रिनकार्ड, नागरिकता लगायतका अन्य प्राय सबै आवेदनमा ६ महिनाभित्र निर्णय दिने युएससीआईएसको लक्ष्य रहेको छ । आई १२९ र आई १४० को प्रिमियम प्रोसेसमा १५ दिनभित्रै निर्णय दिने र आई १२९ को नियमित आवेदनमा २ महिनाभित्र निर्णय दिने युएससीआईएसको लक्ष्य रहेको छ ।
एकबर्षको अवधिमा युएससीआईएसले प्रकृया अवधि कम गर्न विभिन्न योजनाहरु ल्याएको छ । एकबर्षको अवधिमा युएससीआईएसले ओपीटीमा जान चाहने विद्यार्थी भिसा वाहकले वर्क परमिटका लागि अनलाइन आवेदन दिनसक्ने, गैरआप्रवासी भिसाको अवधि थप्न र परिवर्तन गर्नका लागि बायोमेट्रिकमा छुट दिने, विभिन्न प्रकारका वर्क परमिटको अवधि बढाउने र स्वत थप्ने, अनलाइनबाटै टीपीएस आवेदन दिनसकिने, स्वास्थ्यकर्मी र बालबालिका हेरचाह गर्नेले छिटो वर्क परमिट नविकरणका लागि अनुरोध गर्नसक्ने लगायतका कैयन योजनाहरु ल्याएको छ ।