झण्डै २ बर्षपछि युएससीआईएसले जुन ४ पछि नियमित सार्वजनिक सेवा सुरु गर्दै
प्रकाशित मिति : चैत्र २, २०७८ बुधबार
झण्डै २ बर्षपछि युएससीआईएसले जुन ४ पछि नियमित सार्वजनिक सेवा सुरु गर्ने तयारी गरेको छ । कोरोनाको महामारीका कारण सन् २०२० को मार्च १८ पछि युएससीआईएसले सेवाग्राहीहरुका लागि फिल्ड अफिस, एसाइलम अफिस र एप्लीकेशन सपोर्ट सेन्टरमा नियमित सेवा बन्द गरेको थियो ।
जुन ४ पछि घरेलु कार्यालयहरू पुनः खोल्न र गैर आकस्मिक सार्वजनिक सेवा सुचारु गर्ने तयारी भइरहेको युएससीआईएसले जनाएको हो ।
केही कार्यालयहरू अस्थायी रूपमा बन्द भएपनि युएससीआईएसले सीमित आपतकालीन सेवाहरू व्यक्तिगत रूपमा प्रदान गरिराखेको छ ।
सेवाहरू पुन सुचारु हुन थालेपछि कार्यालयहरूले सामाजिक दूरी सुनिश्चित गर्न, सरसफाईको लागि समय दिन र प्रतीक्षालयको भार कम गर्न अपोइन्टमेन्ट र अन्तर्वार्ताको संख्या घटाउने भएको छ । अपोइन्टमेन्ट सूचनाहरूमा आगन्तुकहरूले पालना गर्नुपर्ने सावधानीहरूको जानकारी समावेश हुनेछ।
बिरामी महसुस गर्नेहरुलाई अपोइन्टमेन्टमा नजान सुझाव दिइएको छ । अपोइन्टमेन्ट सूचनामा दिइएका निर्देशनहरू पालना गर्न र स्वस्थ भइसकेपछि अपोइन्टमेन्ट पुन तय गर्न भनिएको छ । बिरामी भएको खण्डमा अपोइन्टमेन्ट पुन तय गर्दा कुनै जरिवाना नलाग्ने युएससीआईएसले प्रष्ट पारेको छ ।
एसाइलम कार्यालयहरूले अस्थायी रुपमा बन्द भएको समयमा रद्द गरिएका अन्तर्वार्ताहरू अटोमेटिक रुपमा पुन तय गर्नेछ । युएससीआईएसले अन्तर्वार्ता पुन तय गर्दा एसाइलम आवेदकहरूले अन्तर्वार्ताको लागि नयाँ समय, मिति र स्थानबारे जानकारी सहितको सूचना प्राप्त गर्नेछन्।
त्यस्तै अस्थायी रुपमा कार्यालयहरु बन्द भएका कारण स्थगित गरिएका अन्य अप्वाइन्टमेन्टहरुका लागि पनि युएससीआईएसले नयाँ सुचना पठाउनेछ ।