ट्रेन स्टेशनमा धकेल्ने र हामफाल्ने घटनापछि न्युयोर्क सिटीका तीनवटा स्टेशनमा ब्यारिअर राखिदै
प्रकाशित मिति : फाल्गुन १५, २०७८ आईतबार
न्युयोर्कको ट्रेन स्टेशनमा गुडिरहेको ट्रेन अगाडि व्यक्तिलाई धकेल्ने र हामफाल्ने जस्ता घटना बढेपछि तीनवटा स्टेशनमा ब्यारिअर राखिने भएको छ । ट्रेनको लिकसम्म पहुच हुनबाट रोक्न विश्वका ट्रेन स्टेशनहरुमा प्रयोग हुँदै आएको जस्तो प्लेटफर्म ब्यारिअर न्युयोर्क सिटीमा समेत राख्न विगत कैयन बर्षदेखि आव्हान गरिदै आएको छ ।
टाइम्स स्क्वायरमा एकजना महिलालाई होमलेसले ट्रेनको लिकमा धकेल्दा गुडिरहेको ट्रेनले किचेर मृत्यु भएको एकमहिनापछि न्युयोर्क सिटीको एमटीएले प्लेटफर्म ब्यारिअर राख्ने योजना ल्याएको हो । अहिले परीक्षणका रुपमा त्यस्ता ब्यारिअरहरु राखिने भएको छ । त्यसमध्ये एउटा स्टेशन टाइम्स स्क्वायर समेत हुनेछ ।
७ नम्बर ट्रेनको टाइम्स स्क्वायर स्टेशनमा यो ब्यारिअर राखिने भएको छ । त्यस्तै इ ट्रेनको क्वीन्समा रहेको सटफिन ब्लुभर्ड आर्चर एभिन्यु जेएफके एयरपोर्ट स्टेशनमा पनि ब्यारिअर राखिने भएको छ । एल ट्रेनको म्यानहटनमा रहेको थर्ड एभिन्यु स्टेशनमा पनि ब्यारिअर राखिने छ । न्युयोर्क सिटीको एमटीएले ब्यारिअर राख्ने सन्दर्भमा विगतमा पनि अध्ययन गर्दै आएपनि अत्यन्तै महँगो हुने निष्कर्षका साथ पछाडि हटेको थियो ।
ट्रेन स्टेशनमा भएको असुरक्षाका कारण न्युयोर्क सिटीका बासिन्दाहरु चिन्तित भइरहेको अवस्थामा चालिएको यो कदमले थप सुरक्षाको अनुभव हुनसक्ने अपेक्षा गरिएको छ । स्टेशन र ट्रेनबाट होमलेसहरुलाई हटाउन तथा सुरक्षा व्यवस्था मजबुत बनाउन न्युयोर्क सिटीका मेयरले नयाँ कार्यक्रम समेत लागु गरिसकेका छन् ।
प्लेटफर्मको किनारामा बार र ढोकाहरु राखिने यो कार्यक्रमका लागि तीनवटा स्टेशनमा मात्र १ सय मिलियन डलर भन्दा बढी खर्च हुने भएको छ । त्यस्तै यो काम पूरा हुन सन् २०२४ सम्म लाग्नसक्ने जनाइएको छ । युरोप र एसियाका कैयन नयाँ ट्रेन स्टेशनमा यस्ता ढोकाहरु राखिएको छ । लण्डन, हङकङ, पेरिस, सिंगापुर, टोकियो लगायतका स्थानमा पनि ट्रेन स्टेशनमा लिकसम्म पहुच रोक्ने ढोकाहरु प्रयोगमा छन् ।
न्युयोर्कको जोन अफ केनेडी जाने एयर ट्रेनमा पनि यस्तो ब्यारिअर राखिएको छ । ट्रेन स्टेशनमा राखिएका यस्ता ब्यारिअर दुर्घटना हुनबाट जोगाउन अत्यन्तै प्रभावकारी हुने गरेका अध्ययनले देखाएका छन् । भींडभाडयुक्त स्टेशनमा ट्रेन ढिलो गर्नु नपर्ने भएकाले पनि यस्तो ब्यारिअर राख्दा ट्रेनको सेवामा समेत सुधार आउने अपेक्षा गरिएको छ ।