क्यापिटल हिल दंगामा स्पीकर पेलोसीको पोडियम बोकेर हिड्नेलाई ७५ दिन जेल सजायको फैसला
प्रकाशित मिति : फाल्गुन १४, २०७८ शनिबार
अमेरिकामा गतबर्षको जनवरी ६ को क्यापिटल हिल दंगामा स्पीकर न्यान्सी पेलोसीको पोडियम बोकेर हिड्ने व्यक्तिलाई अदालतले ७५ दिन जेल सजायको फैसला गरेको छ । आदम जोन्सन नामका फ्लोरिडाका ती व्यक्तिले पेलोसीको पोडियम बोकेर हिडेको तस्वीर भाइरल भएको थियो ।
घरमै बस्दै आएका पाँचजना बच्चाका पिता जोन्सन गतबर्षको जनवरीमा तत्कालिन राष्ट्रपति डोनाल्ड ट्रम्पको समर्थनका लागि २०२० को चुनावी परिणाम उल्टाउने मुद्दामा वासिंटन डिसी पुगेका थिए । अमेरिकी डिस्ट्रिक्ट कोर्टका न्यायाधिस रेगी वाल्टनले शुक्रबार जोन्सनविरुद्धको मुद्दाको फैसला गर्दै सजाय सुनाएका हुन् ।
जोन्सनले मुद्दा चलिरहेको अवस्थामा पहिले नै जेलमा बिताएको समयका लागि भने क्रेडिट पाउनेछन् । अर्थात् पहिले नै बिताएको समयलाई अहिले फैसला गरिएको जेल सजायको अवधिमा घटाइनेछ । जोन्सनले ५ हजार डलर जरिवाना समेत तिर्नुपर्ने फैसला अदालतले गरेको छ । जोन्सनले आफू क्यापिटल हिल दंगाको हिस्सा बनेकोमा लज्जाबोध भएको बताएका छन् ।
अरु कुनै देशमा यस्तो गरेको भए आफूले पहिले नै गोली खाइसकेको हुने र अदालतमा उपस्थीत हुने मौका नपाउने जोन्सनले बताए । स्पीकर पेलोसीलाई नोक्सान गर्ने कुनै उद्देश्य नभएको र यदि भेट भएको भए सेल्फी खिच्न भन्ने उनले बताए ।
क्यापिटल हिल दंगामा संलग्न ७४० जनालाई एफबीआइले पक्राउ गरिसकेको छ । उक्त दिन झण्डै २५ सय जना व्यक्ति दंगामा सहभागी भएका थिए । सुरक्षा अधिकारीलाई आगो निभाउने उपकरणले आक्रमण गर्ने रोबर्ट पाल्मरलाई संघीय जेलमा ५ बर्षको सजाय दिइसकिएको छ ।
त्यस्तै बिहिबार भींडलाई पेलोसीको लबीतिर बढाउने जेफ्री रजिष्टरलाई ७५ दिन जेल सजायको फैसला गरिएको थियो । त्यस्तै यसै साताको सुरुमा मारिपोसा क्यास्ट्रोलाई ४५ दिन जेल सजाय सुनाइएको थियो । अहिलेसम्म ४० जनालाई सजाय सुनाइसकिएको छ भने २ सयभन्दा धेरैले आफ्नो गल्ती स्वीकार गरिसकेका छन् ।