युक्रेनको संसदमा सहयोगी देशहरुको झण्डा प्रदर्शन
प्रकाशित मिति : माघ १८, २०७८ मंगलबार
युक्रेनी सीमामा करिब एक लाख रुसी सेना तैनाथ गरिएको छ र रुसले युक्रेनमा आक्रमण गर्न सक्ने डर छ । यस्तो तनावका बिचमा पनि युक्रेनका राष्ट्रपतिले सहयोगी राष्ट्रको प्रशंसा गरेका छन् ।
बढ्दो तनावको बीचमा, युक्रेनी राष्ट्रपति भोलोडिमिर जेलेन्स्कीले रुस विरुद्ध मद्दत गर्न तयार रहेका पश्चिमी देशहरूको प्रशंसा गरेका हुन। ‘यो 2014 पछि युक्रेनको लागि सबैभन्दा ठूलो समर्थन हो,’जेलेन्स्कीले आफ्ना सांसदहरूलाई भने।
युक्रेनका राष्ट्रपतिले संसदलाई भने, ‘बेलायत र पोल्याण्डसँग नयाँ प्रकारको राजनीतिक साझेदारीको लागि वार्ता भइरहेको छ।’ युक्रेनका विदेशमन्त्री दिमित्रो कुलेबाले यो साझेदारीले व्यापार, लगानी र ऊर्जा सुरक्षा समेट्ने बताए । युक्रेन संकटलाई लिएर अमेरिका र रुसका उच्च अधिकारीहरू बीच नयाँ शिराबाट वार्ता गर्न लागेका छन्।
बेलायत र पोल्याण्डका प्रधानमन्त्री युक्रेन
यसैबीच, बेलायती प्रधानमन्त्री बोरिस जोन्सन पनि भोलोडिमिर जेलेन्स्कीलाई भेट्न युक्रेनको राजधानी पुग्दैछन् ।
जोनसनले ट्वीट गर्दै भनेका छन्, बेलायतले युक्रेनको सार्वभौमसत्ता समाप्त गर्न चाहनेहरूको सामनामा युक्रेनलाई मित्र र लोकतान्त्रिक सहयोगीको रूपमा समर्थन जारी राख्नेछ।
पोल्याण्डका प्रधानमन्त्री पनि किभ पुगेका छन् । उनले युक्रेनका लागि ड्रोन, एन्टिएयरक्राफ्ट मिसाइललगायतका हतियार र मानवीय सहायता उपलब्ध गराउने वाचा गरेका छन् ।
यदि रुसले युक्रेनमा आक्रमण गरेमा देशले ठूलो संख्यामा शरणार्थी ल्याउने तयारी गरिरहेको पोल्याण्डले जनाएको छ ।
रुसले युक्रेनमा आक्रमण गर्ने योजना बारम्बार अस्वीकार गर्दै आएको छ तर रुसले युक्रेनको सिमानामा करिब १ लाख सैनिक, ट्याङ्क र मिसाइल तैनाथ गरेको छ ।
रुसको सेनालाई युक्रेनसँग तुलना गर्ने हो भने रुस निकै अगाडि छ । रुसको करिब ९ लाख सक्रिय सैनिक छन् भने युक्रेनको यो संख्या २ लाख छन ।
अब भोलोडिमिर जेलेन्स्कीले संसदमा युक्रेनी सेनामा १ लाख सक्रिय सैनिक बढाउन आदेश दिएको बताएका छन् । देश द्वन्द्वको संघारमा रहेकाले यो संख्या नबढाइएको उनले बताए । यो युक्रेनको शान्ति र अगाडिका चुनौतीहरूको लागि हो। बिबिसि