टेक्सासमा बन्धक बनाउने व्यक्ति २ साता अगाडि अमेरिका आएको खुलासा, बेलायतमा २ जना पक्राउ
प्रकाशित मिति : माघ ३, २०७८ सोमबार
टेक्सासमा धार्मिकस्थलभित्र ४ जनालाई बन्धक बनाउने व्यक्ति २ साता अगाडि अमेरिका आएको खुलासा भएको छ । यहुदीहरुको धार्मिक स्थलमा शनिबार ४ जना व्यक्तिलाई घण्टौं बन्धक बनाउने व्यक्ति ४४ बर्षका बेलायती नागरिक मलिक फैसाल अक्रम न्युयोर्कको जोन अफ केनेडी विमानस्थलबाट अमेरिका प्रवेश गरेको जनाइएको छ ।
एफबीआईको उद्दार टोलीले बन्धक बनाइएकाहरुको उद्दारका क्रममा अक्रम मारिएका छन् भने शनिबार राती ९ बजेतिर बन्धक बनाइएकाहरुको उद्दार गरिएको थियो । घटनास्थलबाट एउटा हतियार बरामद गरिएको थियो । बन्धक बनाइएका सबैजना सकुशल रहेका छन् ।
यो घटनाको अनुसन्धानका क्रममा बेलायतमा २ जना टिनएजरहरुलाई पक्राउ गरिएको छ । साउथ म्यानचेस्टरमा पक्राउ परेका ती टिनएजरको लिंग र उमेर भने खुलाइएको छैन । उनीहरुलाई हिराशतमा लिएर सोधपुछ भइरहेको प्रहरीले जनाएको छ ।
बन्धक बनाइएकाहरुको सकुशल उद्दार
अक्रम यहुदीहरुको धार्मिकस्थलमा शनिबार विहान ११ बजेतिर प्रवेश गरेर फेसबुक र जुममा लाइभ गरेको जनाइएको छ । त्यसपछि ४ जनालाई बन्धक बनाइएकोमा एकजनालाइै बेलुका ५ बजेतिर रिहा गरिएको थियो । बन्धक बनाउने अक्रमले जेलमा रहेकी अफिया सिद्दिकीको रिहाईको माग गर्दै उनीहरुलाई बन्धक बनाएको जनाईको छ ।
अक्रमका भाई गुलबारले अक्रमको मानसिक स्वास्थ्य ठीक नभएको बताएका छन् । उनले पीडितहरुसँग माफी समेत मागेका छन् ।
को हुन् सिद्धिकी ?
अमेरिकी सेनाको हत्या प्रयास गरेको अभियोगमा ८६ बर्षको जेल सजाय भोगिरहेकी सिद्दिकीको रिहाईको माग गर्दै बन्धक बनाइएको थियो । सिद्दिकी लामोसमयसम्म आतंकवादी दुनियामा कुख्यात नाम हो । उनी लेडी अलकायदाका रुपमा समेत कुख्यात थिइन् । आईसीसले पनि उनको रिहाईको माग गरेको थियो ।
सन् २०१० मा अफगानिस्तानमा अमेरिकी सेना र अधिकारीहरुको हत्या प्रयास गरेको अभियोग पुष्टी भएपछि उनले जेल जीवन बिताइरहेकी छिन् । उग्रवादी इस्लामहरुका साथै मुलधारका अमेरिकी मुस्लिम समुहहरुले समेत उनको रिहाईको माग गर्दै आएका छन् । सिद्दिकी निर्दोष रहेको र रिहा गर्नुपर्ने माग गरिदै आएको छ । सन् २०१४ मा आईसीसले पनि अमेरिकन पत्रकार जेम्स फोलेको रिहाईका लागि सिद्दिकीलाई अमेरिकाले रिहा गर्नुपर्ने माग गरेको थियो तर पछि आईसीसले ती पत्रकारको हत्या गरेको थियो ।