टेक्सासमा ४ जनालाई बन्धक बनाउने व्यक्ति बेलायती नागरिक, रिहाको माग गरिएकी सिद्धिकी को हुन् ?
प्रकाशित मिति : माघ २, २०७८ आईतबार
टेक्सासमा धार्मिकस्थलभित्र ४ जनालाई बन्धक बनाउने व्यक्तिको एफबीआईले पहिचान गरेको छ । यहुदीहरुको धार्मिक स्थलमा शनिबार ४ जना व्यक्तिलाई घण्टौं बन्धक बनाउने व्यक्ति ४४ बर्षका बेलायती नागरिक मलिक फैसाल अक्रम रहेको एफबीआईले जनाएको छ ।
एफबीआईको उद्दार टोलीले बन्धक बनाइएकाहरुको उद्दारका क्रममा अक्रम मारिएका छन् भने शनिबार राती ९ बजेतिर बन्धक बनाइएकाहरुको उद्दार गरिएको थियो । घटनास्थलबाट एउटा हतियार बरामद गरिएको छ । बन्धक बनाइएका सबैजना सकुशल रहेका छन् ।
अक्रम यहुदीहरुको धार्मिकस्थलमा विहान ११ बजेतिर प्रवेश गरेर फेसबुक र जुममा लाइभ गरेको जनाइएको छ । त्यसपछि ४ जनालाई बन्धक बनाइएकोमा एकजनालाइै बेलुका ५ बजेतिर रिहा गरिएको थियो । बन्धक बनाउने अक्रमले जेलमा रहेकी अफिया सिद्दिकीको रिहाईको माग गर्दै उनीहरुलाई बन्धक बनाएको जनाईको छ ।
अमेरिकी सेनाको हत्या प्रयास गरेको अभियोगमा ८६ बर्षको जेल सजाय भोगिरहेकी सिद्दिकीको रिहाईको माग गर्दै बन्धक बनाइएको थियो । सिद्दिकी लामोसमयसम्म आतंकवादी दुनियामा कुख्यात नाम हो । उनी लेडी अलकायदाका रुपमा समेत कुख्यात थिइन् । आईसीसले पनि उनको रिहाईको माग गरेको थियो ।
सन् २०१० मा अफगानिस्तानमा अमेरिकी सेना र अधिकारीहरुको हत्या प्रयास गरेको अभियोग पुष्टी भएपछि उनले जेल जीवन बिताइरहेकी छिन् । उग्रवादी इस्लामहरुका साथै मुलधारका अमेरिकी मुस्लिम समुहहरुले समेत उनको रिहाईको माग गर्दै आएका छन् । सिद्दिकी निर्दोष रहेको र रिहा गर्नुपर्ने माग गरिदै आएको छ । सन् २०१४ मा आईसीसले पनि अमेरिकन पत्रकार जेम्स फोलेको रिहाईका लागि सिद्दिकीलाई अमेरिकाले रिहा गर्नुपर्ने माग गरेको थियो तर पछि आईसीसले ती पत्रकारको हत्या गरेको थियो ।