टिग्रे हवाई हमलामा एक महिनामा १०८ सर्वसाधारणको मृत्यु : राष्ट्रसंघ


प्रकाशित मिति : पुस ३०, २०७८ शुक्रबार

इथियोपियाको युद्धग्रस्त उत्तरी टिग्रे क्षेत्रमा भएको श्रृंखलाबद्ध हवाई कारबाहीमा यस महिनामा कम्तीमा १०८ सर्वसाधारणको मृत्यु भएको संयुक्त राष्ट्रसंघले शुक्रबार जनाएको छ ।

संयुक्त राष्ट्रसंघले त्यहाँको खाद्य वितरण कार्य रोकिनसक्ने अवस्था रहेको भन्दै त्यस क्षेत्रमा आउनसक्ने मानवीय सङ्कटबारे पनि चेतावनी दिएको छ ।

राष्ट्रसंघीय मानवअधिकार कार्यालयले इथियोपियाली अधिकारीहरूलाई नागरिकहरूको सुरक्षा सुनिश्चित गर्न आग्रह गरेको छ । यस संस्थाले गैर–सैन्य निशानामा प्रहार गरिएको असमान आक्रमण युद्ध अपराध बराबर हुनसक्ने चेतावनी दिएको छ ।

यस क्षेत्रको सत्ताधारी दल ‘टिग्रे पीपुल्स लिबरेसन फ्रन्ट (टीपीएलएफ)’ले संघीय सेनाको शिविरहरूमा आक्रमण गरेको आरोप लगाएपछि प्रधानमन्त्री अबी अहमदले उत्तरी इथियोपियाको टिग्रे क्षेत्रमा सन् २०२० को नोभेम्बरदेखि द्वन्द्व सुरू भएको हो ।

राष्ट्रसंघीय मानवअधिकार कार्यालयकी प्रवक्ता लिज थ्रोसेलले जेनेभामा संवाददाताहरूसँग भन्नुभयो, “इथियोपियाको टिग्रे क्षेत्रमा हवाई हमलाका कारण सर्वसाधारण घाइते हुने वा मर्ने अवस्थाले हामीलाई चिन्तित बनाएको छ ।

उहाँले भन्नुभयो, “इथियोपियन वायुसेनाले गरेको भनिएको हवाई हमलाका कारण नयाँ वर्ष सुरु भएयता कम्तीमा १०८ सर्वसाधारण को मृत्यु भएको र अन्य ७५ जना घाइते भएको रिपोर्टहरूमा जनाइएको छ ।”

उहाँले आन्तरिकरूपमा विस्थापित व्यक्तिहरूका लागि जनवरी ७ मा डेडेबिट शिविरमा भएको आक्रमणलगायतका विभिन्न हवाई हमलामा परी कम्तीमा ५६ जनाको मृत्यु भएको थियो भने अन्य ३० जना घाइते भएका पुष्टि गर्नुभयो । घाइतेमध्ये तीन जनाको पछि अस्पतालमा मृत्यु भएको थियो ।

यस हप्ता पनिसोमबार १७ जना नागरिकको मृत्यु भएको र २१ जना घाइते भएको रिपोर्ट गरिएको छ । एउटा मिलमा भएको हवाई आक्रमणपछि मंगलबार राज्यको स्वामित्वमा रहेको एउटा प्राबिधिक तथा व्यवसायिक शिक्षा तथा ट्रेनिङ इन्स्टिच्युटमा प्रहार भएको थियो र तीन जनाको मृत्यु भएको थ्रोसेलले बताउनुभयो । गत हप्ता अन्य थुप्रै हवाई हमलाको रिपोर्ट गरिएको उहाँको भनाइ छ ।

थ्रोसेलले भन्नुभयो, “हामी इथियोपियाली अधिकारीहरू र उनीहरूका सहयोगीलाई अन्तरराष्ट्रिय कानुनअन्तर्गत उनीहरूको दायित्व अनुरूप नागरिक तथा नागरिक वस्तुहरूको सुरक्षा सुनिश्चित गर्न आह्वान गर्छौं ।” उहाँले थप्नुभयो, “भिन्नता र समानुपातिक सिद्धान्तलाई आदर गर्न नसक्नु नै युद्ध अपराध हुन सक्छ ।”

यसबीच संयुक्त राष्ट्रसंघको विश्व खाद्य कार्यक्रमले टिग्रेमा मानवीय सहयोग वितरण न्यून हुँदै गएको बताएको छ । द्वन्द्वको वृद्धिको कारण डिसेम्बरको मध्यदेखि कुनै पनि समूह सहयोगसहित टिग्रेको राजधानी मेकेलमा पुगेको छैन ।

विश्व खाद्य कार्यक्रमका प्रवक्ता टोमसन फिरीले संवाददाताहरूसँग भन्नुभयो, “ छिमेकमा भएको तीव्र लडाइँले इन्धन र खाद्यान्नको मार्ग रोकेको कारण उत्तरी इथियोपियामा जीवन रक्षार्थ दिइँदै आएकोे खाद्य सहायता परिचालन रोक्न लागिएको छ ।

फिरीले थप्नुभयो, “उत्तरी इथियोपियामा १४ महिनाको द्वन्द्वपछि खाद्यान्नको आवश्यकता पहिलेभन्दा धेरै भएको छ । खानेकुरा र इन्धनमा नागरिक वा सहयोगी संस्थाको पहुँच छैन । हामी ठूलो मानवीय विपत्तिको मुखैमा छौं ।” एजेन्सी

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com