बैंक अफ अमेरिकाले चेक बाउन्स शुल्क नलिने, ओभरड्राफ्ट शुल्क घटाउने
प्रकाशित मिति : पुस २७, २०७८ मंगलबार
बैंक अफ अमेरिकाले चेक बाउन्स शुल्क नलिने भएको छ भने ओभरड्राफ्ट शुल्क पनि घटाउने भएको छ । अमेरिकाको ठूलो मध्येको बैंकका रुपमा स्थपित बैंक अफ अमेरिकाले ग्राहकहरुलाई आकर्षित गर्न नयाँ योजना ल्याएको हो ।
अमेरिकामा चेस बैंकपछि दोश्रो ठूलो बैंकका रुपमा रहेको यो बैंकले अर्को महिनादेखि लागु हुनेगरी चेक बाउन्स शुल्क हटाउने भएको छ भने मे महिनादेखि लागु हुनेगरी ओभरड्राफ्ट शुल्क ३५ डलरबाट घटाएर १० डलर बनाउन लागेको छ । यदि ग्राहकको खातामा कम रकम भएको अवस्थामा बढी रकम खर्च गरेमा बैंकले ओभरड्राफ्ट शुल्क लिदै आएको छ ।
त्यस्तै बैंक अफ अमेरिकाले एटीएमबाट रकम निकाल्दा ग्राहकलाई ओभरड्राफ्ट हुन दिनेछैन । ओभरड्राफ्ट हुन नदिन एउटा एकाउन्टबाट अर्को एकाउन्टमा स्वत रकम स्थानान्तरण गर्दा लाग्ने १२ डलर शुल्क पनि हटाउने भएको छ ।
चेस बैंकले पनि ओभरड्राफ्ट शुल्कबारे कदम चालेको बताएको थियो । चेसले अप्रयाप्त कोष शुल्क हटाएको र ओभरड्राफ्ट शुल्क लिनु अगाडि ग्राहकले ओभरड्र गर्नसक्ने रकमलाई बढाएको चेसले बताएको छ ।
अमेरिकाको छैठौं ठूलो बैंकका रुपमा रहेको क्यापिटल वानले ग्राहकले खातामा भएको भन्दा बढी रकम खर्च गरेमा वा बढी रकमको चेक काटेमा ओभरड्राफ्ट भएको अवस्थामा जरिवाना नलिने घोषणा गरेको एकमहिनापछि बैंक अफ अमेरिकाको यो घोषणा आएको हो । एली लगायतका साना बैंकहरुले पनि हालैका दिनमा ओभरड्राफ्ट शुल्क हटाएका छन् ।