युएससीआईएसले अप्रिल १ मा १० बर्ष पुराना ‘ई -भेरिफाइ’का रेकर्ड नष्ट गर्ने
प्रकाशित मिति : पुस २३, २०७८ शुक्रबार
आगामी अप्रिल १ मा अमेरिकाको अध्यागमन एजेन्सी युएससीआईएसले १० बर्ष पुराना ई भेरिफाइका रेकर्डहरु नष्ट गर्ने भएको छ । सन् २०११ को डिसेम्बर ३१ भन्दा अगाडिका सबै रेकर्ड नष्ट गर्ने युएससीआईसले जनाएको छ ।
युएससीआईसले नष्ट गर्नु अगाडि ई भेरिफाइ गर्ने रोजगारदाताहरुले केस सम्बन्धित पुराना सुचना र रेकर्डहरु डाउनलोड गर्न सक्नेछन् । त्यसका लागि आगामी मार्च ३१ भित्र डाउनलोड गरिसक्नुपर्ने युएससीआईएसले जनाएको छ ।
रोजगारदाताहरुले ई भेरिफाइ केस प्रमाणिकरण नम्बर फर्म आई ९ रोजगार योग्यता प्रमाणिकरण फर्मसँगै उल्लेख गर्न आवश्यक हुन्छ वा फर्मसँगै ई भेरिफिकेशनको केसको विस्तृत विवरण भएको पेज राख्नुपर्छ । रोजगारदाताहरुले फर्म आई ९ सँगै ऐतिहासिक अभिलेख रिपोर्टहरु राख्नुपर्छ ।
ई भेरिफिकेशन वेवसाइटमा आधारित प्रणाली हो । रोजगारदाताले कामदार अमेरिकामा काम गर्न योग्य भए नभएको प्रमाणिकरण यो प्रणालीमार्फत गर्न सक्छन् । योग्य भएको प्रमाणित भएमा यसको रेकर्ड आई ९ फर्मसँगै राख्नुपर्छ । पेरोलमा काममा राखिएका हरेक व्यक्तिको आई ९ फर्म राख्नुपर्छ ।
कुनै व्यक्तिलाई काममा राखेको ३ बर्षसम्म वा काम छाडेको एकबर्षसम्म जुन पछिल्लो अवधि हुन्छ त्यो अवधिसम्म आई ९ फर्म सुरक्षित राख्नुपर्छ । यो फर्म युएससीआईएस वा आईससमक्ष फाइल गर्नु पर्दैन । तर सरकारी अधिकारीहरु निरिक्षणमा आएको खण्डमा भने यो फर्म देखाउन आवश्यक हुन्छ ।