एसबीएबाट कोरोना सम्बन्धित ऋण र सहयोगको आवेदन लिन बन्द, अपिल गर्न र ऋण थप्न सकिने
प्रकाशित मिति : पुस १९, २०७८ सोमबार
अमेरिकाको साना व्यवसाय प्रशासन एसबीएले जनवरी १ शनिबारदेखि कोरोना सम्बन्धित ऋण र सहयोगको आवेदन लिन बन्द गरेको छ । इकोनोमिक इन्जुरी डिसास्टर लोन अन्तरगत तिर्नु नपर्ने सहयोग रकम र सस्तो ब्याजमा उपलब्ध गराइने ऋणका लागि आवेदन बन्द भएपनि ऋण थप, पुनमूल्यांकन र पुनरावलोकनका लागि गरिएका अनुरोध भने स्वीकार गरिने भएको छ ।
डिसेम्बर ३१ को डेडलाइनभन्दा अगाडि प्राप्त आवेदनका सन्दर्भमा प्रारम्भिक आवेदन अस्वीकार भएको ६ महिनाभित्र पुनमूल्यांकनका लागि अनुरोध गर्न सकिनेछ भने पुनमूल्यांकनका लागि गरिएको अनुरोध पनि अस्वीकार भएको ३० दिनभित्र अपिलका लागि अनुरोध गर्न सकिनेछ । कोष उपलब्ध भएको खण्डमा उल्लेखित अवधिभित्र आएका अनुरोधबारे निर्णय गरिने एसबीएले जनाएको छ ।
त्यस्तै ऋण रकम बढाउन चाहनेहरुले सुरुमा ऋण प्रदान गरिएको मितिले २ बर्षभित्र रकम बढाउनका लागि अनुरोध गर्न सकिनेछ । तर कोष उपलब्ध नभएको खण्डमा भने ऋण रकम बढाउन आएको अनुरोध अस्वीकृत हुनसक्नेछ । त्यसैले कोष उपलब्ध रहेको वा पहिलोपटक ऋण प्रदान गरिएको मितिले २ बर्षमध्ये जुन छिटो हुनेछ, त्यसलाई नै मान्यता दिइनेछ ।
१० हजारडलरसम्मको इकोनोमिक इन्जुरी डिसास्टर लोन अन्तरगतको फिर्ता गर्नु नपर्ने रकमका लागि एड्भान्स र टार्गेटेड एडभान्सका सन्दर्भमा पनि आगामी दिनमा निर्णय गरिने एसबीएले जनाएको छ । तर ५ हजार डलरको पूरक टार्गेटेड एड्भान्स रकम भने अब प्रदान नगरिने जनाइएको छ ।