न्युयोर्कमा यो सिजनको पहिलो हिमपात सोमबार, ३ इन्चसम्म हिमपात हुने, विहानको यात्रा खतरापूर्ण
प्रकाशित मिति : पुस १८, २०७८ आईतबार
न्युयोर्कमा सोमबार यो सिजनको पहिलो हिमपात हुने भएको छ । सोमबार न्युयोर्क सिटीमा तीनइन्चसम्म हिमपात हुने मौषमविदहरुको अनुमान रहेको छ । तापक्रम उच्च भएको भोलिपल्ट नै हिमपात हुनुलाई सन् २०२२ को अनौठो सुरुवात मानिएको छ ।
आइतबार न्युयोर्कको तापक्रम उच्च बिन्दुमा पुगेको थियो भने त्यसको १२ घण्टापछि हिमपात हुने भएको छ । आइतबार सेन्ट्रल पार्कको तापक्रम ६८ डिग्री फरेनहाइटसम्म मापन गरिएको थियो । सोमबार तापक्रम २४ डिग्री फरेनहाइटसम्म तल झर्नेछ भने सोमबार विहान ३ बजेदेखि नै हलुका हिमपात सुरु हुने भएको छ ।
न्युयोर्क, न्युजर्सी र पेन्सिलभेनियासहित आसपासका राज्यमा समेत सोमबार हिमपात हुने भएको छ । कतिपय क्षेत्रमा ८ इन्चसम्म हिमपात हुने अनुमान गरिएको छ । विहानको हिमपातका कारण यात्रा जोखिमपूर्ण हुने चेतावनी समेत दिइएको छ । न्युजर्सीको ओसन काउन्टीमा सबैभन्दा बढी हिमपात हुने अनुमान गरिएको छ ।
मंगलबार तापक्रम केही उच्च हुने र हिउँ पग्लिने अनुमान गरिएको छ । मंगलबार तापक्रमण ३८ डिग्री फरेनहाइटसम्म पुग्नेछ भने आंशिक रुपमा घाम समेत लाग्ने जनाइएको छ । यद्यपी आइतबार रातीदेखि नै न्युयोर्क सिटीका सडकमा नुन छर्न सुरु गरिनेछ । न्युयोर्क सिटीमा ७ सय भन्दा धेरै नुन छर्ने गाडीहरु तयारी अवस्थामा रहेका छन् ।