नजिकको नदेख्नेका लागि अब चस्माको साटो ‘आई ड्रप’, चस्मा विस्थापित हुनसक्ने
प्रकाशित मिति : मंसिर २४, २०७८ शुक्रबार
उमेरका कारण नजिकको नदेख्ने समस्या हुनेहरुका लागि एफडीएबाट हालै स्वीकृत आँखामा थोपा हाल्ने औषधी स्वीकृत गरेपछि यसले लाखौं अमेरिकनको जीवनशैली नै परिवर्तन गर्ने अपेक्षा गरिएको छ । खासगरी ४० बर्ष काटेपछि नजिकको राम्ररी नदेख्ने उमेर सम्बन्धित समस्या हुनेहरुका लागि यो औषधी स्वीकृत गरिएको हो ।
भुइटी नामको यो औषधी एफडीएबाट अक्टोबरमा प्रयोगका लागि स्वीकृत गरिएको थियो । नजिकको दृश्य देख्नमा समस्या हुनेहरु अमेरिकामा झण्डै १२८ मिलियन व्यक्ति रहेका छन् । अब उनीहरुमध्ये कैयनको जीवनशैली यो औषधीले परिवर्तन गर्ने अपेक्षा गरिएको छ ।
यो औषधी आँखामा हालेको १५ मिनेटमा नै काम गर्न थाल्ने जनाइएको छ । हरेक आँखामा एकएक थोपा यो औषधी राखेपछि ६ घण्टादेखि १० घण्टासम्मका लागि नजिकको दृश्य नदेख्ने समस्या समाधान हुने कम्पनीले जनाएको छ । अर्थात् एकथोपा औषधीले १० घण्टासम्म आँखाको दृश्यशक्ति बलियो बनाउनेछ ।
क्लीनिकल परीक्षणमा सहभागी ७५० जनामध्ये एक टोनी राइटले यो औषधी जीवन नै परिवर्तन गर्ने खालको भएको बताएका छन् । औषधीको प्रयोगभन्दा अगाडि राइटले कार्यालय, बाथरुम, किचन, कार लगायत जताततै चस्मा राख्नुपर्ने समस्या रहेको अहिले उक्त समस्याबाट मुक्ति मिलेको बताएका छन् ।
भुइटी उमेर सम्बन्धित कमजोर निकट दृष्टिको उपचारका लागि एफडीएबाट स्वीकृत पहिलो आँखामा थोपा हाल्ने औषधी हो । चिकित्सकको परामर्शमा दिइने यो औषधीले आाखाको पुतलीको आकार प्राकृतिक रुपमा घटाउन मद्दत गर्ने चिकित्सकले बताएका छन् । आँखाको पुतलीको आकार घट्दा फोकसको गहिराईमा बृद्धि हुने तथा यसले फरक फरक दुरीमा फोकस गर्न मद्दत गर्ने जनाइएको छ ।
३० दिनसम्म प्रयोग गर्न मिल्ने यो औषधीको मूल्य ८० डलर पर्छ । यो औषधीले ४० देखि ५५ बर्षका व्यक्तिमा सबैभन्दा राम्रो काम गर्ने गरेको पाइएको छ । केहीमा टाउको दुख्ने र आँखा रातो हुने जस्ता साइड इफेक्टहरु पनि क्लीनिकल परीक्षणमा देखिएका थिए । ६५ बर्षभन्दा माथिको उमेरका व्यक्तिका लागि भने यो औषधी कम प्रभावकारी पाइएको छ ।
अहिलेसम्म यो औषधीलाई अमेरिकामा कुनै पनि इन्सुरेन्सले कभर गर्दैन । चस्माहरु कम महँगो विकल्प रहेकाले इन्सुरेन्स कम्पनीहरुले यो औषधीलाई कभर गर्ने तत्काल सम्भावना नरहेको जनाइएको छ । कतिपयले यो औषधीलाई ब्याकअपका रुपमा समेत प्रयोग गर्न सक्नेछन् ।