नयाँ भेरियन्टविरुद्ध खोपको प्रभावकारिताबारे २ सातामा रिपोर्ट, आवश्यक परे ६ सातामा नयाँ खोप
प्रकाशित मिति : मंसिर १०, २०७८ शुक्रबार
दक्षिण अफ्रिकामा भेटिएको कोरोनाको नयाँ भेरियन्टविरुद्ध फाइजर खोपले काम गर्ने नगर्नेबारे रिपोर्ट २ सातामा सार्वजनिक गर्ने फाइजरले जनाएको छ । नयाँ भेरियन्ट संक्रामक रहेको र छिटो उत्परिवर्तन भइरहेको भन्दै वैज्ञानिकहरुले चिन्ता व्यक्ति गरिरहँदा फाइजरले दुईसाताभित्र खोपको प्रभावकारिताबारे तथ्यांक ल्याउने बताएको हो ।
आफूहरुले कोरोनाको भेरियन्ट बी वान वान ५२९ बारे विज्ञहरुको चिन्ता र तत्काल उक्त भेरियन्टबिरुद्ध सुरु गरिएको अनुसन्धानबारे राम्रोसँग बुझेको भन्दै फाइजरले आवश्यक परेमा नयाँ भेरियन्टविरुद्ध १ सय दिनमा भ्याक्सिन ल्याउनसक्ने बताएको छ । ल्याब परीक्षणबाट नयाँ भेरियन्ट खोपबाट बच्न सक्ने भए नभएको तथा भ्याक्सिनमा समायोजन आवश्यक भए नभएको थाहा हुने फाइजरले जनाएको छ ।
यदि अहिलेको भ्याक्सिनबाट नयाँ भेरियन्ट बच्नसक्ने अवस्था आएमा भ्याक्सिन ६ साताभित्र नयाँ स्वरुपमा बनाउन सकिने र एकसयदिनभित्र भ्याक्सिन पठाउन सकिने फाइजरले दावी गरेको छ । यो घोषणासँगै फाइजर र बायो एनटेकको शेयर शुक्रबार उल्लेख्य बृद्धि भएको छ ।
फाइजर र बायोएनटेकले चीनमा पहिलोपटक भेटिएको भाइरसको आधारमा एमआरएनए भ्याक्सिन बनाएका हुन् । अल्फा र डेल्टा भेरियन्टबिरुद्धको भ्याक्सिनको क्लीनिकल परीक्षण पनि भइरहेको छ । यसैबीच जोन्सन एण्ड जोन्सनले पनि कोरोनाको नयाँ भेरियन्टको नजिकबाट अवलोकन गरिरहेको बताएको छ ।
दक्षिण अफ्रिकामा भेटिएको नयाँ भेरियन्टका कारण विश्वका कैयन देशहरुले यात्रा प्रतिबन्धहरुको घोषणा गरिसकेका छन् । अमेरिकाले पनि दक्षिण अफ्रिका लगायतका ८ वटा देशबाट अमेरिका आउनमा प्रतिबन्धको घोषणा गरिसकेको छ ।