लण्डनबाट स्पेन जान उडेका जोडी गलत विमान चढ्दा १२ सय माइल परको ग्रिसमा
प्रकाशित मिति : मंसिर ३, २०७८ शुक्रबार
लण्डनबाट स्पेन जान उडेका जोडी एयरलाइन्सको गल्तीले १२ सय माइल परको ग्रिसमा पुगेका छन् । रायनएयरमार्फत स्पेन जान उडेका उनीहरुले लण्डनको स्टान्स्टेड एयरपोर्टमा चेकइन गरेका थिए ।
हुमारिया र फारुख शेख विदा मनाउन स्पेनको सेभिल जान लागेका थिए तर उनीहरुलाई विमानले ग्रिक आइल्याण्डमा लगेर छाडेको छ । ग्रिसमा पुगेर ट्याक्सी चढ्ने क्रममा मात्र उनीहरुले गलत देशमा आइपुगेको जानकारी पाएका हुन् ।
आफ्नो फोनमा ग्रिसमा स्वागत छ भन्ने सन्देश आएपछि उनीहरुले ट्याक्सी ड्राइभरलाई सोध्दा आफूहरु स्पेन नपुगेको जानकारी पाएका थिए । त्यसपछि उनीहरुले रायन एयरको कर्मचारीसँग कुरा गर्दा मजाक उडाएको र जम्मा एकरातको होटल प्रस्ताव गरेको जनाएका छन् ।
एयरलाइन्सले जम्मा एकरातको होटल खर्च बेहोरेको र आफूहरुले अरु तिनरातको बेहोर्नुपरेको उनीहरुले बताए । आमाले ग्रिसबाट फोनमा रुदै कुरा गरेको छोरा सुलेमानले बताएका छन् । यो सुरक्षा र उत्तरदायीत्वको कमीमात्र नभई यस्तो गल्तीले आफ्ना बुबाआमा असाध्यै आत्तिएको छोराको भनाई छ ।
स्पेनमा गरेको होटल बुकिङ लगायतमा एकहजार युरो खर्च भएको र आफूले त्यसको रिफण्ड पनि पाउन नसकेको छोराले बताए । रायनएयरले विमान चढ्नेबेलामा गेटमा उडान नम्बर र गन्तव्य स्पष्टसँग लेखिने भएकाले सही विमानमा चढ्नु यात्रुको समेत दायीत्व भएको बताएको छ ।
विमान चढ्ने बेलामा अन्तिम गेटमा भएको गल्तीले यस्तो भएको जनाइएको छ । यस्तो गल्ती दोहोरिन नदिन लण्डनमा रहेको आफ्नो परिचालन एजेण्टसँग काम गरिरहेको रायन एयरले जनाएको छ ।