३७५ मिलियनमा वासिङटन डिसीमा रहेको होटल बेच्दै ट्रम्प, नाम पनि फेरिने
प्रकाशित मिति : कार्तिक २९, २०७८ सोमबार
अमेरिकी पूर्वराष्ट्रपति डोनाल्ड ट्रम्पको संस्था ट्रम्प अर्गनाइजेसनले वासिङटन डिसीमा रहेको होटल ३७५ मिलियन डलरमा बेच्ने भएको छ । मायामीमा रहेको लगानी कम्पनी सीजीआई मर्चेन्ट ग्रुपले ट्रम्पको होटल लिजमा लिने सहमति भएको जनाइएको छ ।
ह्वाइट हाउसबाट नजिकै रहेको ऐतिहासिक भवनमा रहेको ट्रम्प इन्टरनेशनल होटल ट्रम्प अर्गनाइजेशनले अमेरिकी सरकारबाट लिजमा लिएको हो । यो होटल विदेशी गन्यमान्य व्यक्ति र ट्रम्पका समर्थकहरुको लोकप्रिय जमघटस्थलका रुपमा रहेको छ ।
अहिले बेच्न लागिएको ट्रम्प इन्टरनेशनल होटलको नाम फेरिने भएको छ भने सीजीआईले नाम फेर्नका लागि हिल्टन वल्र्डवाइडसँग सहमति गरिसकेको छ । यो होटलले ट्रम्पको कार्यकालमा १५० मिलियन आम्दानी गरेको ट्रम्पले दावी गरेका थिए तर होटलले ७० मिलियन डलरभन्दा धेरै नोक्सानीको सामना गरेको थियो।
होटेलले ७ हजार ४ सय रात बराबरको बसाईका लागि विदेशी सरकारहरुबाट ३ दशमलव ७ मिलियन डलर प्राप्त गरेको खुलासा भएको थियो । सन् २०१६ को सेप्टेम्बरमा उक्त होटल ट्रम्प अर्गनाइजेसनले आम मानिसका लागि खुला गरेको थियो।
ट्रम्प अर्गनाइजेसनले यो होटलको भवन ६० वर्षको भाडामा लिएको थियो। सन् २०१९ देखि नै अर्गनाइजेसनले २६३ कोठा भएको यो होटल बिक्री गर्न ग्राहक खोजिरहेको थियो। लगानी कम्पनी जीसीआई मर्चेन्ट ग्रुपसँग भएको यो सम्झौता सन् २०२२ को पहिलो त्रैमासभित्र पूरा हुने अपेक्षा गरिएको छ।
यो होटल वासिंटन डिसीमा वासिंटन मोनुमेन्टपछिको दोश्रो अग्लो भवन हो । यो भवनमा होटल संचालन हुनुभन्दा अगाडि अमेरिकाको सरकारी हुलाकको मुख्यालय रहेको थियो ।