विद्युतीय राहदानीमा हुने सुरक्षा विशेषताहरु सरकारबाट स्वीकृत, यस्तो हुनेछ विद्युतीय राहदानी
प्रकाशित मिति : आश्विन १९, २०७८ मंगलबार
सरकारले विद्युतीय राहदानीमा रहने विभिन्न सुरक्षासम्बन्धी विशेषताहरु स्वीकृत गरेको छ । मन्त्रिपरिषद्को आजको बैठकले विद्युतीय राहदानीमा रहने विशेषता स्वीकृत गरेको हो ।
कार्तिक अन्तिम हप्ताबाट विद्युतीय राहदानी सञ्चालनमा ल्याउने
सरकारले निकट भविष्यमा नै विद्युतीय राहदानी सञ्चालनमा ल्याउने तयारी गरेको छ । राहदानी विभागले कार्तिक अन्तिम हप्ताबाट विद्युतीय राहदानी सञ्चालनमा ल्याउने जनाएको छ ।
राहदानी विभागले केही दिन अगाडि जारी गरेको सुचनामा भनिएको छ – ‘यही २०७८ कार्तिक अन्तिम हप्ताबाट निकै सुरक्षित र भरपर्दो विद्युतीय राहदानी जारी हुने कार्य तालिका रहेको छ । हालको मेशिन रिडेबल राहदानीको म्याद सकिएमा यो चालकअनुमति पत्र जस्तै नवीकरण गर्न पर्दैन र कुनै थप दस्तुर पनि लाग्दैन ।’
कार्तिकको अन्तिम साताबाट विद्युतीय राहदानी जारी हुने भएकाले अत्यावश्यक नभइ बनाएर घरमा राख्नको लागि मात्र हालको मेशिन रिडेबल राहदानी नबनाउन राहदानी विभागले अनुरोध गरेको छ । तर हालको मेसिन रिडेबल राहदानीको म्याद भएसम्म विद्युतीय राहदानी बनाउन भने नपर्ने जनाइएको छ ।
राहदानी विभागका महानिर्देशक डोरनाथ अर्यालले आगामी माघ महिनादेखि पूर्णरूपमा विद्युतीय राहदानी जारी गर्ने कार्यक्रम रहेको र परीक्षणको रूपमा सोभन्दा अगावै विद्युतीय राहदानी जारी हुने बताएका थिए । जसअनुशार कार्तिकको अन्तिमबाटै जारी गर्ने योजनामा राहदानी विभाग रहेको छ ।
यस्ता हुनेछन् विशेषता
बायोमेट्रिक पासपोर्ट समेत भनिने यस्तो राहदानीमा सबै बायोमेट्रिक विवरणहरु चिपमा राखिएका हुन्छन् । अगाडि वा पछाडिको कभरमा वा मध्यपृष्ठमा चिप र एन्टेना इम्बेड गरेर राखिएको हुन्छ ।
अहिलेको एमआरएपीको तस्वीर भएको डाटा पेजमा अप्टिकल क्यारेक्टर रिकगनाइजेसन फरम्याटमा मेसिन रिडेबल जोन हुने भएकाले राहदानी रिडर मेसिनले रिड गर्दा राहदानीमा उल्लेखित महत्वपूर्ण विवरणहरू देखिने व्यवस्था रहेको छ भने विद्युतीय राहदानीमा यसको अलावा विद्युतीय चिप र एन्टेनासमेत जडान गरिएको हुनेछ ।
चिपमा औंठाछाप, तस्विर लगायतका व्यक्तिगत विवरणहरू हने र यी विवरणहरू राखेर चिप लक गरिसकेपछि कसैले थपघट वा फेरबदल गर्न नसक्ने जनाइएको छ ।
अर्यालका अनुशार नेपालले जारी गर्न लागेको पोलिकार्बोनेट सहितको विद्युतीय राहदानी हो। पोलिकार्बोनेट सहितको डाटा पेजमा विद्युतीय चिप र एन्टेना जडान गरिएको हुन्छ जुन आँखाले सहजै देख्न सकिँदैन। अब जारी हुने साधारण राहदानीको रंग चकलेटी खैरो हुनेछ ।
त्यस्तै साधारण राहदानी ३४ पेज र ६६ पेज गरी दुई प्रकारका जारी हुनेछ। अब जारी हुने राहदानीहरू कुटनीतिक, विशेष, सर्भिस, अस्थायी, साधारण, सिम्यान्स अभिलेख किताब गरी सात प्रकारका हुने जनाइएको छ ।
यात्रा सहज हुने अपेक्षा
एमआरपी राहदानी विस्थापित गर्ने विद्युतीय राहदानीले आम नेपाली नागरिकलाई विश्व यात्रामा सहज बनाउनेछ । जसअनुसार विद्युतीय राहदानी वितरण भएपछि नेपालको यात्रीले अन्तर्राष्ट्रिय स्तरको आवागमनको सुविधा प्राप्त गर्ने विभागले जनाएको छ । अरुबेला जस्तो घण्टौँ लाइनमा बस्नुपर्ने झन्झटबाटसमेत नेपाली नागरिकले छुटकारा पाउने छन् ।
विद्युतीय राहदानी मेसिनमा छुवाएपछि बारम्बार परीक्षणको झन्झट पनि हट्नेछ । त्यस्तै विद्युतीय ढोका रहेका कतिपय अन्तर्राष्ट्रिय विमानस्थलमा वाहकको अनुहार सेन्सरले हेरेकै भरमा आवागमनका लागि ढोका खुल्दा नेपाली नागरिकले त्यो ढोकाबाट सहजै आवागमन गर्न पाउने छन् ।
एमआरपी राहदानी बोक्ने नेपाली नागरिकले लाममा बसेर विभिन्न मेसिनमा परीक्षण गराउँदै घण्टौँको व्यवस्थापकीय कारबाही झेल्दै अघि बढ्नुपर्ने अवस्थाको अन्त्य विद्युतीय राहदानीले गर्नेछ ।
विश्वका १ सय ५० बढी देशमा विद्युतीय राहदानी
अहिले विश्वका १ सय ५० भन्दा बढी देशले विद्युतीय राहदानी जारी गरिरहेका छन् । विश्वमा सबैभन्दा पहिले विद्युतीय राहदानी मलेसियाले सन् १९९८ बाट जारी गर्न थालेको हो । सन् २००८ सम्म ६० भन्दा बढीदेशले जारी गरेकोमा अहिले १५० भन्दा बढी पुगिसकेको छ ।
भारतले कूटनीतिक राहदानीहरुमात्र विद्युतीय राहदानीका रुपमा जारी गर्दै आएको छ । सर्वसाधारणका लागि विद्युतीय पासपोर्ट निकट भविश्यमा नै जारी गर्ने योजनामा भारत रहेको छ ।