Follow @khasokhasmag

मिस नेपाल युएस: सेप्टेम्बर २५ मा न्युयोर्कमा अञ्जु पन्त, किरण गजमेर र बिक्की गुरुङ लगायतले गाउने


प्रकाशित मिति : आश्विन ६, २०७८ बुधबार

मिस नेपाल युएसको १० औं वार्षिकोत्सवका अवसरमा आगामी शनिबार न्युयोर्कमा आयोजना गरिने कार्यक्रममा चर्चित कलाकार अञ्जु पन्त, भ्वाइस अफ नेपाल सिजन ३ का विजेता किरण गजमेर र युवा पुस्तामाझ लोकप्रिय कलाकार बिक्की गुरुङ लगायतले गाउने भएका छन् । न्युयोर्कको क्वीन्स थियटरमा हुने कार्यक्रममा बेलुका ६ बजेदेखि हुने कार्यक्रममा यी कलाकारहरुको प्रस्तुती विशेष आकर्षणका रुपमा रहनेछ ।

नेपाली अमेरिकन कलाकार संघका कलाकारहरु लगायत अन्य कलाकारहरुले समेत लाइभ प्रस्तुती दिने आयोजकले जानकारी दिएका छन् । कार्यक्रममा प्रवेशका लागि बुधबारसम्मका लागि टिकटमा २० प्रतिशतसम्म छुट दिइएको छ भने बिहिबारदेखि सामान्य प्रवेशको ५० डलर र भीआईपीको १५० डलर शुल्क लाग्नेछ । भीआईपीहरुका लागि कार्यक्रमपछि ककटेल रिसेप्सन र विजेता एवं सिलेब्रेटीहरुसँग फोटोसेसन समेत राखिएको छ ।

टिकटका लागि यहाँ क्लीक गर्नुहोला ।

शनिबार मिस नेपाल युएसको आठौं संस्करण आयोजना गरिदैछ । प्रतियोगिताका लागि १० अन्तिम प्रतिस्पर्धी छनौट भइसकेका छन् भने उनीहरुका लागि भर्चुअल तालिम संचालन भइरहेको छ । शनिबार हुने प्रतियोगिताबाट मिस नेपाल युएस २०२१ को घोषणा गरिनेछ । मिस नेपाल युएस २०२१ को टपटेनमा पुग्न सफल हुने प्रतिस्पर्धीहरु अपेक्षा सिंह गुरुङ परियार, कला न्यौपाने, प्रतिक्षा शुक्ला, प्रतिशा प्रधान, प्रितिजा जैशी, रीया श्रेष्ठ, सुनिता अधिकारी, सन्यामिता श्रेष्ठ, सोनिश्या थापा र एलिसा लिम्बु रहेका छन् ।

सेप्टेम्बरको पहिलोसातासम्म प्राप्त आवेदनका आधारमा मिस नेपाल युएसका टपटेन प्रतिस्पर्धीहरु छनौट गरिएको हो । महिला शिक्षा र सशक्तिकरणका क्षेत्रमा उल्लेख्य योगदान गर्दै आएको मिस नेपाल युएस विसुद्ध सौन्दर्य प्रतियोगितामात्र नभई एउटा सामाजिक अभियानका रुपमा रहदै आएको छ ।

सन् २०११ मा न्यूयोर्कबाट सुरु भएको प्रतियोगितामा सुजिता बस्नेतले पहिलो मिस नेपाल युएसको ताज पहिरिएकी थिइन् । आफ्नो समुदाय र संस्कृतिका पक्षमा वकालत गर्नसक्ने साथै नेतृत्व लिन सक्ने युवाहरुको उत्पादनमा यस कार्यक्रमले विगत १० वर्षदेखि महत्वपूर्ण भूमिका निर्वाह गर्दै आएको कार्यक्रमका संस्थापक तथा अध्यक्ष अमित शाह बताउँछन् ।

मिस नेपाल युएसले अमेरिककी सरकारबाट ट्रेडमार्क समेत पाइसकेको छ । प्रतियोगिता सुरु गरेको झण्डै १० बर्षपछि मिस नेपाल युएसले अमेरिकी सरकारको ट्रेडमार्क अफिसबाट औपचारिक रुपमा ट्रेडमार्क पाउन सफल भएको हो ।

सौन्दर्य प्रतियोगिताको प्रकृतिमा मनोरञ्जनमुलक श्रेणी ४१ मा मिस नेपाल युएसले ट्रेडमार्क पाएको हो । पहिलोपटक सन् २०११ को जुनमा प्रयोग भएको र अगस्तमा व्यवसायीक रुपमा प्रयोग भएको इतिहाससहित ट्रेडमार्क प्रमाणपत्र पाएको हो । प्रमाणपत्र नम्बर ६४५११७६ रहेको छ ।

 

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com