क्यालिफोर्नियामा सुमन पोख्रेलको अस्पताल भर्ना भएको केही समयमै निधन, गोफण्डमीमा सहयोग
प्रकाशित मिति : भाद्र २०, २०७८ आईतबार
अमेरिकाको क्यालिफोर्निया निवासी नेपाली युवा २७ बर्षका सुमन पोख्रेलको अस्पताल भर्ना भएको केही समयमै निधन भएपछि दाहसंस्कार लगायतको लागि गोफण्डमीमा सहयोग संकलन अभियान सुरु गरिएको छ । पोख्रेलको परिवारलाई अमेरिकामा बोलाएर दाहसंस्कार गर्ने वा शव नेपाल पठाउने निश्चित नभएपनि जुनसुकै अवस्थामा पनि खर्चिलो हुने भएकाले सहयोग संकलन सुरु गरिएको हो ।
४४ हजार डलरको लक्ष्यसहित गोफण्डमीमा सुरु सहयोग संकलन अभियानमा यो समाचार तयार पार्दासम्म २२ हजार ३ सय ६ डलर संकलन भइसकेको छ । फण्डरेज द ह्वाइट जोन नामको गैर नाफामुलक संस्थाका तर्फबाट गरिएको हो ।
यदि तपाई गोफण्डमी मार्फत सहयोग गर्न चाहनुहुन्छ भने यहाँ क्लीक गर्नुहोला ।
झापा स्थायी घर भएका र ४ बर्षदेखि नर्दन क्यालिफोर्नियाको रिचमण्डमा बस्दै आएका पोख्रेलको शनिबार निधन भएको हो । तर मृत्युको कारण भने खुलाइएको छैन । गतबर्ष नेपाल गएर विवाह गरेर आएका उनकी २२ बर्षकी श्रीमति र एक छोरा छन् । सुमनको साथीहरुका अनुशार उनी अत्यन्तै मिलनशार स्वभावका रहेका थिए ।
यसैबीच मेरिल्याण्ड राज्य सांसद ह्यारी भण्डारीले पोखे्रलको निधनप्रति दुख व्यक्त गर्दै पारिवारका सदस्यहरुको चाहना अनुशार पार्थिव शरीर व्यवस्थापनका लागि सरोकारवाला निकायसँग समन्वय गरी सम्पूर्ण प्रकृया पूरा गरिने बताएका छन् । एकपछि अर्को समुदायका सदस्यहरु गुमाउँदा आफू मर्माहत भएको भन्दै मृतकको आत्माको चीर शान्तिको कामना गर्दै श्रद्धाञ्जली व्यक्त गरेका छन् ।