अपराधको शिकार भएका कागजपत्रविहिनहरुलाई अमेरिकामा पक्राउ र देशनिकाला नगर्ने नयाँ नीति
प्रकाशित मिति : श्रावण २७, २०७८ बुधबार
अपराधको शिकार भएका कागजपत्रविहिनहरुलाई अमेरिकामा इमिग्रेशन एण्ड कस्टम इन्फोर्समेन्ट आइसले पक्राउ र देशनिकाला नगर्ने भएको छ । नयाँ निर्देशिका अनुशार अपवादको अवस्थामाबाहेक अपराधको शिकार भएकाहरुलाई अमेरिकामा पक्राउ र देशनिकाला नगरिने भएको छ ।
ट्रम्प प्रशासनको देशनिकालाको प्राथमिकता उल्टाउने क्रममा बुधबार नयाँ नीति सार्वजनिक गरिएको हो । आइसका अधिकारीहरुले कागजपत्रविहिनलाई न्याय खोज्न र अध्यागमन सुविधा लिनका लागि सघाउनुपर्ने नयाँ निर्देशिकामा उल्लेख छ ।
ड्युटीमा रहेका बेला आइसका अधिकारीहरुले कागजपत्रविहिन अपराधको शिकार भए नभएको जाँच गर्ने प्रमाणहरु हेर्नुपर्ने आइसका कार्यकारी निर्देशक ताइ जोन्सनले हस्ताक्षर गरेको निर्देशिकामा उल्लेख छ । विगतको नीतिले आइसका अधिकारीहरुलाई धेरै तजविज अधिकार दिएको थियो ।
तर अब सम्भावित अपराधको शिकार भएका कागजपत्रविहिनलाई सघाउन आइसका अधिकारीहरुले सकृय रुपमा भूमिका निभाउनुपर्ने भएको छ । अब सम्भावित अपराधको शिकार भएकाहरुले उनीहरुका लागि उपलब्ध उचित सेवा प्राप्त गर्ने भएका छन् ।