अमेरिकाको अध्यागमन एजेन्सी युएससीआईएस प्रमुखमा पहिलोपटक महिला
प्रकाशित मिति : श्रावण १६, २०७८ शनिबार
अमेरिकी भिसा, ग्रिनकार्ड, नागरिकता लगायतका अध्यागमन विषयहरु हेर्ने सरकारी एजेन्सी युएससीआईएसको प्रमुखमा पहिलोपटक महिला नियुक्त गरिएको छ । अमेरिकी सिनेटले युएससीआईएस प्रमुखमा राष्ट्रपति बाइडेनको छनौटमा रहेकी उर जदउलाई सुनिश्चित गरेको हो ।
युएससीआईएस लामो समयदेखि कार्यवाहक प्रमुखले चलाउदै आएकोमा निर्देशकमा जदउको नियुक्ती सिनेटबाट पारित भएपछि अब युएससीआईएसले पूर्ण प्रमुख प्राप्त गरेको छ । बाइडेन प्रशासनले अध्यागमनका मापदण्डहरुमा परिवर्तन गरेपनि त्यसलाई हेरविचार गर्नका लागि नियुक्त गरिने नेतृत्वको नाम सिनेटबाट पारित हुन बाँकी रहेको थियो ।
अहिलेसम्म डिपार्टमेन्ट अफ होमल्याण्ड सेक्युरिटी अन्तरगतका तीन मुख्य निकायहरु युएससीआईएस, आईस र सीबीपी कार्यवाहकले चलाउँदै आएका छन् । शुक्रबार सिनेटमा गरिएको मतदानमा युएससीआईएस निर्देशकको नियुक्तीका पक्षमा ४७ र विपक्षमा ३४ मत खसेको थियो । डोनाल्ड ट्रम्पको कार्यकालमा सन् २०१९ मा एल फ्रान्सिस सिस्नाले युएससीआईएस छाडेपछि कार्यवाहकले चलाउदै आएका छन् ।
ट्रम्प कार्यकाल युएससीआईएस एसाइलम लगायतका अध्यागमन नीतिमा गरिएको कडाईका कारण केन्द्रबिन्दुमा रहदै आएको थियो । तर बाइडेन प्रशासनले युएससीआईएसले आप्रवासीमैत्री बनाउने प्रतिबद्धता जनाउदै आएको छ । ट्रम्प प्रशासनले ल्याएका नीतिहरुलाई उल्टाएर नरम नीतिहरु लागु गर्दै युएससीआईएसलाई बाइडेन प्रशासनले फरक ढंगले अगाडि बढाउने प्रतिबद्धता जनाएको छ ।
उर जदउको अध्यागमन कानून, नीति र प्रशासनको क्षेत्रमा दुईदशक लामो अनुभव रहेको छ । उनले अमेरिकाको अध्यागमन प्रणालीलाई न्यायसंगत तरिकाले र निष्पक्ष तरिकाले संचालन गर्ने डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले अपेक्षा व्यक्त गरेका छन् । मिहिनेती आप्रवासीकी छोरीका रुपमा उनले आप्रवासी परिवारहरुलाई समृद्ध बनाउने र उनीहरुले सामना गरिरहेका समस्यालाई बुझ्ने मेयरकासको भनाई छ ।