उकालो लाग्दै कोरोनाः काठमाडौं उपत्यकामा एकै दिन थपिए ९९९ संक्रमित
प्रकाशित मिति : श्रावण ११, २०७८ सोमबार
काठमाडौं उपत्यकामा कोरोना संक्रमण पुनः तीव्र रुपमा बढ्न थालेको छ। पछिल्लो २४ घण्टामा उपत्यकामा मात्रै ९९९ जना कोरोना संक्रमित थपिएका छन्।
थपिएका संक्रमितमध्ये काठमाडौंका सबैभन्दा बढी ६७७ जना छन्। यसैगरी भक्तपुरमा १२५ र ललितपुरमा १९७ जना संक्रमित थपिएको मन्त्रालयले जनाएको छ।
काठमाडौंमा सक्रिय संक्रमितको संख्या करिब ६ हजार पुग्न लागेको छ। सोमबारको तथ्यांकअनुसार यो संख्या ५ हजार ९ सय १० छ।
काठमाडौंमा हालसम्म संक्रमितको संख्या २ लाख १४ हजार १ सय २८ पुगेको छ भने २ लाख ६ हजार २ सय ६९ जना निको भइसकेका छन्। हालसम्म काठमाडौंमा १ हजार ९ सय ४९ जनाको मृत्यु भएको छ।
यस्तै, भक्तपुरमा सक्रिय संक्रमित ९ सय ३६ र ललितपुरमा १ हजार १ सय ६३ पुगेको छ। हालसम्म संक्रमितको संख्या भक्तपुरमा २३ हजार ७ सय ८९ र ललितपुरमा ४० हजार १ सय २४ पुगेको छ।
देशभरको अवस्था
पछिल्लो २४ घन्टामा देशभर ३ हजार ४२१ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयका अनुसार १७ हजार २७२ नमुना परीक्षण गरिएकोमा उक्त संख्यामा संक्रमण पुष्टि भएको हो।
सोमबारसम्म देशभर सक्रिय संक्रमितको संख्या २७ हजार ९०८ पुगेको छ। पछिल्लो २४ घन्टामा १ हजार ६८६ जना संक्रमणमुक्त भएका छन्। योसँगै नेपालमा संक्रमणमुक्त हुने संख्या ६ लाख ४५ हजार ३०१ पुगेको छ।
सोमबार कोरोना संक्रमणबाट २५ जनाको निधन भएको छ। मन्त्रालयले हालसम्म संक्रमणबाट ९ हजार ७३८ जनाको निधन भएको जनाएको छ।