कांग्रेस महाधिवेशनः साउन १२ को वडा अधिवेशन स्थगित, महाधिवेशन भने तोकिएकै मितिमा हुने
प्रकाशित मिति : श्रावण ९, २०७८ शनिबार
नेपाली कांग्रेसको १४ औं महाधिवेशनअन्तर्गत साउन १२ गते हुने भनिएको वडा अधिवेशन स्थगित भएको छ। प्रधानमन्त्री एवं सभापति शेरबहादुर देउवा निवास बुढानीलकण्ठमा बसेको पदाधिकारी बैठकले कार्यतालिकाअनुसार साउन १२ गते वडा अधिवेशन गर्न नसकिने निष्कर्ष निकालेको हो।
कार्यतालिकाअनुसार साउन १२ मा वडा अधिवेशन सम्भव नदेखिएपछि तत्काल स्थगित गर्ने निर्णय भएको सहमहामन्त्री प्रकाशशरण महतले जानकारी दिएका छन्। पदाधिकारीको अर्को बैठकले वडासहित तल्लो तहका अधिवेशनहरूको मिति टुंगो लगाउने जनाइएको छ।
यस्तै, क्रियाशील सदस्यता छानबिन समितिलाई साउन १२ गते सूची बुझाउन समय दिइएको छ। यसअघि असार मसान्तसम्म सूची बुझाउन छानबिन समितिलाई दिइएको समय थपेर साउन १२ सम्म पुर्याइएको कांग्रेस पार्टी कार्यालयका मुख्य सचिव कृष्णप्रसाद पौडेलले जानकारी दिए।
छानबिन समितिले क्रियाशील सदस्यताको सूची बुझाइसकेपछि नयाँ कार्यतालिका तय गर्ने निर्णय बैठकले गरेको छ।
अरू तहहरूको अधिवेशनका लागि कार्यतालिका हेरफेर भए पनि भदौ १६–१९ गतेका लागि तोकिएको महाधिवेशनको मिति परिवर्तन गर्न नहुने बैठकले निष्कर्ष निकालेको छ। सभापति देउवाले पनि महाधिवेशनको मिति हेरफेर नहुने बताएका थिए। वडा, नगर तथा जिल्ला अधिवेशनहरूको बीचमा रहेको अन्तरलाई छोट्याएर भए पनि केन्द्रीय महाधिवेशन प्रभावित गर्न नहुने विचार बैठकमा देउवाले राखेका थिए।