जापानले दिने १६ लाख डोज खोप केही दिनभित्रै नेपाल आइपुग्ने
प्रकाशित मिति : श्रावण ७, २०७८ बिहीबार
जापानले उपलब्ध गराउने १६ लाख डोज एस्ट्रोजेनेका खोप केहीदिनभित्रै नेपाल आइपुग्ने भएको छ। जापानी राजदूत किकुता युताकासँगको बिहीबारको भेटपछि प्रधानमन्त्री शेरबहादुर देउवाले खोप चाँडै नेपाल आइपुग्ने जनाएका हुन्।
‘जापानले दिन लागेको १६ लाख डोज खोप चाँडै काठमाडौं आइपुग्ने छ। यो राम्रो समाचारका लागि धन्यवाद। आगामी दिनमा थप खोप उपलब्ध गराउन आग्रह गर्दछु,’ प्रधानमन्त्री देउवाले ट्वीटरमा भनेका छन्।
Accepting a token of love from Mr. Kikuta Yutaka, Japan’s Ambassador to Nepal, at Baluwatar today. Thank you for the good news that the 1.6 million #AstraZeneca vaccines donated by Japan will arrive in Kathmandu soon, and for pledging to provide more, in the near future. pic.twitter.com/Ik6luynBsp
— Sher Bahadur Deuba (@SherBDeuba) July 22, 2021
राजदूत युताकाले देउवालाई बिहीबार दिउँसो प्रधानमन्त्री निवास बालुवाटारमा शिष्टाचार भेट गरेका हुन्।
भेटका क्रममा उनले प्रधानमन्त्री देउवालाई बधाइ तथा शुभकामना दिएका थिए। राजदूत युताकाले जापानी प्रधानमन्त्री सुगा योसिहिदेले पठाएको बधाई सन्देश पनि देउवालाई हस्तान्तरण गरेका थिए।
राजदूत युताकासँगको भेटमा प्रधानमन्त्री देउवाले द्विपक्षीय सम्बन्धलाई अझै मजबुत बनाउनेबारे कुरा गरेका थिए।
भेटका क्रममा राजदूत युताकाले भविष्यमा थप खोप पनि नेपाललाई दिने प्रतिवद्धता जनाएको देउवाको सचिवालयले जानकारी दिएको छ।
उक्त खोप पहिलो डोज कोभिशिल्ड लगाएर दोस्रो डोज कुरिरहेका ज्येष्ठ नागरिकलाई दिइने जनाइएको छ।
एडीबीले खोप खरिदका लागि १९ अर्ब ८० करोड दिने
एशियाली विकास बैंक (एडीबी) ले कोभिड–१९ विरुद्धको खोप खरिदका लागि १९ अर्ब ८० करोड ऋण दिने भएको छ।
बैंकले ६८ लाख नेपाली लाभान्वित हुने गरी एक करोड ५९ लाख मात्रा खोप खरिद गर्न उक्त रकम ऋणस्वरुप नेपाल सरकारलाई उपलब्ध गराउने निर्णय बिहीबार गरेको मनिलास्थित बैंकको प्रधान कार्यालयले जनाएको छ।
जीवनरक्षाका निम्ति अत्यावश्यक खोप खरिद गर्न तथा आफ्ना नागरिकहरूलाई संक्रमणबाट बचाउन शीघ्र खोप खरिद गरी नागरिकलाई लगाउन अपरिहार्य भएको बताउँदै बैंकका अध्यक्ष मासाटुगु आशाकावाले अर्थतन्त्रलाई पुनर्जीवन दिन र नागरिकका दैनिकी एवं आर्थिक गतिविधि पुनःसञ्चालन गर्न नेपालका निम्ति खोप उपयोगी हुने विश्वास व्यक्त गरे।