एमाले केन्द्रीय कमिटी: देउवालाई विश्वासको मत दिने २२ सांसदलाई स्पष्टीकरण साेधिने, १० बुँदे सहमति अनुमोदन
प्रकाशित मिति : श्रावण ४, २०७८ सोमबार
नेकपा एमालेले प्रधानमन्त्री शेरबहादुर देउवालाई विश्वासको मत दिने पार्टीका २२ सांसदलाई स्पष्टीकरण सोध्ने भएको छ। सोमबार बसेको केन्द्रीय कमिटी बैठकले पार्टी अनुशासनविपरीत कार्य गरेको भन्दै उनीहरुलाई २४ घण्टे स्पष्टीकरण सोध्ने निर्णय गरेको हो। स्पष्टीकरण सोध्नेबारेको प्रस्ताव केन्द्रीय कमिटी बैठकमा पार्टी अध्यक्ष केपी ओलीले नै गरेका थिए।
‘हिजो पार्टीका कतिपय सांसदहरूले पार्टी निर्णयको अवज्ञा गरेर फ्लोर क्रस गरेर शेरबहादुर देउवालाई जुन विश्वासको मत दिने काम गर्नुभएको छ, त्यो कम्युनिस्ट आन्दोलनको आदर्श र जनताको भावनाविपरीत छ,’ ज्ञवालीले सञ्चारकर्मीसँग भने, ‘अनुशासनहीन काम भएकाले उहाँहरूलाई स्पष्टीकरण माग गर्ने निर्णय भएको छ।’
स्पष्टीकरणमा आएको जवाफका आधारमा कारबाहीबारे पार्टीले थप कदम चाल्ने उनले बताए। केन्द्रीय कमिटी बैठकले विवाद समाधान कार्यदलले तयार पारेको १० बुँदे सहमतिलाई अनुमोदन गर्दै कार्यान्वयनमा लैजाने निर्णय पनि गरेको छ।
प्रधानमन्त्री शेरबहादुर देउवाले आइतबार लिएको विश्वासको मतमा केपी ओली पक्षका सांसदले पनि देउवाको पक्षमा मतदान गरेका थिए भने माधव नेपालपक्षका १० सांसदले मत नै दिएनन्। देउवाको पक्षमा विश्वासको मत दिने एमाले सांसदको संख्या २२ थियो, जसमा नेपालपक्षका १४ र ओलीपक्षका ८ जना छन्।