नेपाली सेनाको सांगठनिक पुनः संरचना कार्यान्वयनमा
प्रकाशित मिति : श्रावण १, २०७८ शुक्रबार
नेपाली सेनाको सांगठनिक पुनः संरचना २०७७–७८ कार्यान्वयनमा आएको छ। पुनः सरचना मन्त्रिपरिषद्को असार २४ को बैठकले स्वीकृत गरेको थियो। प्रधानसेनापति पूर्णचन्द्र थापाले सैनिक मुख्यालय जंगी अड्डामा शुक्रबार आयोजित समारोहमा कमाण्ड सेनापतिलाई झण्डा हस्तान्तरण गरेको सैनिक जनसम्पर्क तथा सूचना निर्देशनालयले जनाएको छ।
सरकारले सैद्धान्तिक स्वीकृति दिएको ३ प्लस १ कमाण्ड अवधारणाको निरन्तरताका रुपमा आएको सांगठनिक पुनः संरचना २०७७–७८ राष्ट्रिय सुरक्षा नीति र दीर्घकालीन सोच २०८७ समेतका आधार तयार पाएिको हो।
सांगठनिक पुनः संरचनाको पूर्ण कार्यान्वयन भने २०८१ असार मसान्तसम्ममा हुने जानकारी दिइएको छ। चार कमाण्ड हेडक्वार्टर शुक्रबारबाटै पूर्णरुपमा सञ्चालनमा आएका छन्। कमाण्डलाई आवश्यक अधिकृत र सकल दर्जाको दरबन्दी क्रमिक रुपमा आगामी ६ वर्षमा पूरा हुने बताइएको छ।
सेनाको संवैधानिक र अन्य जिम्मेवारीलाई थप असरदाररुपमा सम्पादन गर्ने लक्ष्य अघि बढाइएको ३ प्लस १ कमाण्ड अवधारणा कार्यान्वयनका लागि सांगठनिक संरचना आवश्यक रहेको सेनाले जनाएको छ। अन्तर्राष्ट्रिय, क्षेत्रीय तथा राष्ट्रिय सुरक्षा परिवेश र अन्तर्राष्ट्रिय अभ्याससमेतलाई दृष्टिगत गरी सेनालाई समयानुकूल व्यावसायिक, चलायमान र गतिशील बनाउन सांगठनिक सरचना अघि बढाइएको हो।
नेपालको नदी क्षेत्रमा उद्धार तथा वन्यजन्तु चोरी शिकारी नियन्त्रण कार्य गर्नसक्ने क्षमताको विकास र तदर्थ रुपमा स्थापना गरिएका अङ्ग सीमा अनुगमन एवं सर्भे निर्देशनालयलाई समेट्न यसले योगदान दिनेछ। फिल्ड तहमा हाल देखिएकामध्ये क्रमका अधिकृत, पदीक र विल्लादारसमेत वृत्ति विकासमा परेका समस्यालाई सम्बोधन र व्यवस्थापन गर्न साङ्गठनिक पुनः संरचना कोशेढुङ्गा सावित हुने जानकारी दिइएको छ।
सांगठनिक पुनः संरचना अघि बढाउने क्रममा सेनामा कायम रहेका विद्यमान कूल संख्यामा कुनै थपघट नहुने मात्र होइन विशिष्ट श्रेणीको दरबन्दी संख्यामा पनि कुनै पनि हेरफेर हुने छैन। सांगठनिक पुनः संरचना २०७७–७८ कार्यान्वयन भएपछि सञ्चार–प्रविधि, मेडिकल, बन्दोबस्ती, इन्जिनियरिङको क्षमता र अवधारणा गुणस्तरीय हुने सेनाले जनाएको छ।रासस