देउवाले लिए प्रधानमन्त्रीको सपथ, चार मन्त्री नियुक्त
प्रकाशित मिति : असार २९, २०७८ मंगलबार
सर्वोच्च अदालतको परमादेशबमोमिज प्रधानमन्त्रीमा नियुक्त भएका नेपाली कांग्रेसका सभापति शेरबहादुर देउवाले सपथ लिएका छन्। शीतलनिवासमा मंगलबार साँझ आयोजित विशेष समारोहमा राष्ट्रपति विद्यादेवी भण्डारीले उनलाई पद तथा गोपनीयताको सपथ दिलाएकी हुन्।
प्रधानमन्त्रीसँगै अन्य मन्त्रीहरुले पनि सपथ लिएका छन्। गृहमा बालकृष्ण खाँण, अर्थमा जनार्दन शर्मा, ऊर्जामा पम्फा भुसाल र कानुनमा ज्ञानेन्द्र कार्कीले सपथ लिएका हुन्।
समारोहमा गठबन्धन दलका नेताहरु पुष्पकमल दाहाल प्रचण्ड, उपेन्द्र यादव, बाबुराम भट्टराईलगायत सहभागी थिए।
नियुक्तिपत्रबारेको विवादले सपथ साढे २ घण्टा ढिला भएको थियो। दिउँसो राष्ट्रपति कार्यालयले जारी गरेको विज्ञप्तिमा सर्वोच्च अदालतको फैसलाबमोजिम नियुक्तमात्र भनिएकोप्रति देउवाले आपत्ति जनाएका थिए। पत्रका संविधानका धारा उल्लेख गर्नुपर्ने अडान देउवाले राखेपछि सपथमा ढिलाइ भएको थियो। २ घण्टासम्म चलेको छलफलमा राष्ट्रपति कार्यालय पत्र सच्याउन तयार भएपछि देउवा पनि सपथ लिन तयार भएका थिए।