कार्यदल बैठकपछि नेम्वाङले भने–आइतबार बिहान ८ बजे सुखद समाचार सुन्न पाउनुहुनेछ
प्रकाशित मिति : असार २६, २०७८ शनिबार
नेकपा एमालेको विवाद आइतबार टुंगिने दाबी नेताहरुले गरेका छन्। शनिबार विवाद समाधान कार्यदलकाे बैठकपछि सञ्चारकर्मीलाई प्रतिक्रिया दिँदै नैता सुवास नेम्वाङले आइतबार बिहान एकताको घोषणा हुने बताएका हुन्।
‘सार्है मिहिनेत र तपाईंहरुकै शुभकामनाले काम टुंग्याएबराबर छ, बिहान ८ बजे नै तपाईंहरुले सुखद समाचार सुन्न पाउनुहुनेछ,’ नेम्वाङले भने।
उनले अब आफूहरुलाई ढुक्कसँग बधाइ र धन्यवाद दिए हुने बताए। ३ वर्षदेखिकाे विवाद मिलाउन केही दिनदेखि वार्ता जारी रहेकाे उल्लेख गर्दै उनले एकता घोषणामा कुनै ढिलाई नभएकाे बताए। अब आफूहरुबीच कुनै विवाद नभएको पनि बताए।
नेपालपक्षीय नेता भीम रावलले पनि समाधान हुन बाँकी रहेका विषयमा छलफल गरी निस्कर्षमा पुग्ने छोटो प्रतिक्रिया दिए।
कार्यदल सदस्य गाेकर्ण विष्टले पनि आइतबार एकताको सन्देश दिने बताए। ‘गम्भीरताका साथ एकले अर्काकौ मनोविज्ञान बुझ्दै छलफल गर्यौं, अब अन्तिम अवस्थामा आइपुगेका छौं, हामी समस्यालाई समग्रतामा समाधान खाेज्ने विन्दुमा आइपुगेका छौं,’ उनले भने।
अब आइतबारका लागि केही औपचारिकता दिलाउनेमात्र काम बाँकी रहेको उनले बताए।
शुक्रबार करिब ८ घण्टासम्म भएको छलफलपछि पनि नेताहरुले सहमतिनजिक पुगेको र केही भाषा मिलाउने काममात्र बाँकी रहेको बताएका थिए। यद्यपि शनिबार नेताहरुले एकता घोषणा गर्नेस्तरमा सहमति गर्न सकेननन्।