जसपा फुट्ने निश्चित, नेताहरुले भने–अब अलग–अलग बाटो लागिन्छ
प्रकाशित मिति : असार २२, २०७८ मंगलबार
१५ महिनाअघि राष्ट्रिय जनता पार्टी (राजपा) र समाजवादी पार्टीबीच एकीकरण भएर गठन भएको जनता समाजवादी पार्टी (जसपा) फुट्ने निश्चित भएको छ। निर्वाचन आयोगमा दुवै पक्षबीच मंगलबार भएको छलफलमा सहमति बन्न नसकेपछि पार्टी फुट्ने निश्चित भएको हो।
छलफलपछि महन्थ ठाकुर पक्षका नेता अनिल झाले कुनै सहमति नबनेकाले अब अलग–अलग बाटो लाग्ने बताए। उनले आफूहरु अब मिल्न नसक्ने भन्दै आयोगलाई छुट्याइदिन आग्रह गरेको बताए।
जसपाको उपेन्द्रपक्षले पार्टीको आधिकारिताको दाबी गर्दै आयोगमा निवेदन दिएका थिए।
आयोगले राजनीतिक दलसम्बन्धी ऐनमा भएको व्यवस्था अनुसार अर्को पक्षलाई लिखित जवाफ पेस गर्न १५ दिनको सूचना दिएको थियो। उक्त सूचना अनुसार अर्को पक्षले लिखित जवाफ पनि पेश गरिसकेपछि राजनीतिक दलसम्बन्धी ऐनमै भएको व्यवस्था अनुसार विवादका पक्षबीचमा आपसी सहमतीबाट विवादका निरुपण गर्नसक्ने, सहमति कायम गरेर विवाद निरुपण गर्ने प्रावधान छ।
सोहीअनुसार सहमती कायम गरेर विवाद निरुपण गर्ने प्रयोजनका लागि आयोगले मंगलबार दुवै पक्षलाई बोलाएको थियो।
छलफलमा दुवै पक्षबीच सहमति हुनसकेन। निर्वाचन आयोगले अब आधिकारिकता दाबी पेश गर्न दुवै पक्षलाई आग्रह गरेको छ। आयोगका प्रवक्ता राजकुमार श्रेष्ठले जसपा विवादमा इजलास गठन गरेर अघि बढ्ने बताए। आयोगले बुधबार इजलास गठन गर्ने र दुवै पक्षले दल दर्तासम्बन्धी ऐनबमोजिम दाबी पेश गर्ने भएका छन्।
निर्वाचन आयोगले यस अगाडि जसपामा दुवै पक्षले गरेका कारबाहीलाई कानुनसम्मत नदेखिएको भन्दै अमान्य घोषित गरिदिएको थियो। आयोगले दुई अध्यक्षसहित पुरानै पदाधिकारी कायम रहने फैसला दिएको थियो।