परीक्षण र संक्रमित दुवै घट्दै, थप १६०३ मा संक्रमण पुष्टि, २७ को मृत्यु
प्रकाशित मिति : असार २०, २०७८ आईतबार
पछिल्लो २४ घन्टामा नेपालमा १ हजार ६०३ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयका अनुसार पिसिआर तथा एन्टिजेनमार्फत् ८ हजार १३२ नमुना परीक्षण गर्दा उक्त संख्यामा संक्रमण पुष्टि भएको हो।
योसँगै नेपालमा कोरोना संक्रमितको संख्या ६ लाख ८२ हजार ७ सय ४९ पुगेको छ।
काठमाडौं उपत्यकामा थप ४६१ जनामा संक्रमण पुष्टि भएको छ। जसमा काठमाडौंमा ३४२, भक्तपुरमा ३१ र ललितपुरमा ८८ संक्रमित थपिएको मन्त्रालयले जनाएको छ।
आइतबार २ हजार ५५१ संक्रमित निको भएका छन्। नेपालमा हालसम्म ६ लाख ९ हजार २१८ जना संक्रमणमुक्त भएका छन्।
यस्तै, पछिल्लो २४ घन्टामा २७ जनाको निधन भएको छ। योसँगै कोरोनाबाट निधन हुनेको संख्या ९ हजार २२५ पुगेको मन्त्रालयले जनाएको छ।
हाल ५ सयभन्दा बढी सक्रिय संक्रमित भएका जिल्ला ९ छन्। जसमा काठमाडौं, ललितपुर, भक्तपुर, चितवन, रुपन्देही, झापा, मोरङ र सुनसरीलगायत छन्।