ओलीको अर्को हार : राजदूतको सिफारिस कार्यान्वयन नगर्न सर्वोच्चको आदेश
प्रकाशित मिति : असार १३, २०७८ आईतबार
प्रधानमन्त्री केपी शर्मा ओलीले सर्वोच्च अदालतबाट अर्को हार व्यहोरेका छन्। नागरिकता अध्यादेश, मन्त्रिपरिषद विस्तारलगायतका निर्णयपछि ओली सरकारले गरेको अर्को निर्णयमाथि पनि सर्वोच्चले रोक लगाइदिएको हो।
पूर्वमन्त्री युवराज कार्कीलाई राजदूतमा गरेको सिफारिस कार्यान्वयन नगर्न सर्वोच्चले आइतबार अन्तरिम आदेश दिएको हो। वैशाख २५ गते बसेको मन्त्रिपरिषद बैठकले कार्कीलाई बहराइनको राजदूत नियुक्त गर्न सिफारिस गरेको थियो।
तर, राजदूत नियुक्तिसम्बन्धी निर्देशिका २०७५ कार्यान्वयन नगर्न यसअघि नै सरकारलाई सर्वोच्चले आदेश दिइसकेको भन्दै न्यायाधीश सपना प्रधान मल्ल र प्रकाशकुमार ढुंगानको इजलासले कार्कीलाई नियुक्ति नदिन आदेश दिएको हो।
कार्कीलाई राजदूतमा नियुक्त गर्न सरकारले निर्देशिका संशोधन गरेको थियो। राजदूत नियुक्त हुन स्नातक उतीर्ण हुनुपर्ने निर्देशिकाले व्यवस्था गरेको छ। तर, सरकारले वैशाख २५ गते निर्देशिका संशोधन गरी मन्त्री भइसकेका व्यक्तिको हकमा त्यो दफा लागू नहुने व्यवस्था गरेको थियो।
निर्देशिका संशोधन भएकै दिन सरकारले कार्कीलाई राजदूतका लागि सिफारिस गरेको थियो। तर, सर्वोच्च अदालतले निर्देशिका संशोधन तत्काल कार्यान्वयन गर्न अन्तरिम आदेश जारी गरेको थियो।