कांग्रेस महाधिवेशन : सभापतिका आकांक्षीहरुले थाले तयारी
प्रकाशित मिति : असार ७, २०७८ सोमबार
नेपाली कांग्रेसका नेताहरुले आगामी भदौ १६–१९ मा तय भएको १४ औं महाधिवेशनको तयारी थालेका छन्। यसैक्रममा सभापतिका आकांक्षीहरुले आफूपक्षीय छलफललाई तीब्रता दिएका छन्।
शनिबार प्रदेश १ र प्रदेश २ बाट प्रतिनिधित्व गर्ने आफूपक्षीय केन्द्रीय सदस्यलाई बोलाएर छलफल गरेका शेरबहादुर देउवाले सोमबार कर्णाली, लुम्बिनी र सुदूर पश्चिमका केन्द्रीय सदस्यसँग छलफल गरे। उनले १४ औं महाधिवेशनमा आफैं दोहोरिने बताइरहेका छन्।
तर उनलाई चुनौती दिइरहेका छन् उपसभापति विमलेन्द्र निधिले। शनिबार र सोमबार दुवै दिनको छलफलमा निधिको उम्मेदवारीको विषयले प्रवेश पाएको थियो। संस्थापन पक्षबाटै निधिले पनि सभापतिमा लड्ने बताएपछि नकारात्मक सन्देश जानसक्ने भन्दै उनलाई फकाउन नेताहरूले देउवालाई सुझाव दिएका छन्।
शनिबार देउवासँगको भेटमा निधिले यसपटक आफूलाई अवसर दिन आग्रह गरेका थिए। जवाफमा देउवाले ‘सभापतिमा लड्ने तपाईंको अधिकार हो लडे हुन्छ,’ भन्ने जवाफ दिएका थिए। निधिले भने आफू लामो समयदेखि एउटै टिममा रहेकाले देउवाकै समर्थनमा सभापति लड्न चाहेको बताएका थिए।
सोमबार बागमती र गण्डकी प्रदेशका केन्द्रीय सदस्यहरुसँगको छलफलमा भने देउवाले निधिले मान्नेजस्तो नदेखिएको बताएका थिए। निधिले सभापतिमा उम्मेदवारी दिए संस्थापन समूह अप्ठ्यारोमा पर्नसक्ने चिन्ता नेताहरूले व्यक्त गरेका छन्। संस्थापन समूहलाई एक ढिक्का राख्न आग्रह गर्दै नेताहरूले यसका लागि पहल गर्न सुझाव दिएका छन्।
निधि पनि छलफलमा
सभापतिका आकांक्षी निधिले पनि नेताहरूसँगको भेटघाटलाई तीव्रता दिएका छन्। उनले महामन्त्री शशांक कोइराला र पूर्वमहामन्त्री प्रकाशमान सिंहसँग भेट गरेका थिए। कोइराला र सिंहले पनि आफूहरु सभापतिका दाबेदार भएको बताउँदै आएका छन्। निधिले सभापतिमा आफूलाई सहयोग गर्न कोइराला र सिंहलाई आग्रह गरेका थिए।
यस्तै, निधिले केन्द्रीय सदस्य धनराज गुरुङ, गगन थापा, प्रदीप पौडेल, जीवन परियारलगायतका नेताहरूसँग पनि छलफल गरेका थिए।