कोरोना संक्रमण घट्ने क्रम जारी, २२९७ मा संक्रमण पुष्टि, ४६ को मृत्यु
प्रकाशित मिति : असार ७, २०७८ सोमबार
नेपालमा कोरोना संक्रमण घट्ने क्रम जारी छ। स्वास्थ्य तथा जनसंख्या मन्त्रालयका अनुसार पछिल्लो २४ घन्टामा नेपालमा २ हजार २९७ जनामा कोरोना संक्रमण पुष्टि भएको छ। ६ हजार ५८३ पिसिआर र ४ हजार ३२१ नमुना परीक्षण गर्दा २ हजार २९७ जनामा संक्रमण पुष्टि भएको हो।
पिसिआर विधिबाट गरिएको परीक्षणमा हालसम्म ६ लाख २२ हजार ६४० जनामा संक्रमण पुष्टि भएको मन्त्रालयको तथ्यांक छ।
सोमबार ३ हजार १३० संक्रमित निको भएका छन्। योसँगै नेपालमा निको हुने संख्या ५ लाख ५९ हजार ९२८ पुगेको छ।
नेपालमा सक्रिय संक्रमितको संख्या पनि घटेको छ। सोमबार सक्रिय संक्रमितको संख्या ५३ हजार ९ सय ४० रहेको छ।
यस्तै, २४ घण्टामा कोरोना संक्रमणबाट ४६ जनाले ज्यान गुमाएका छन्। योसँगै नेपालमा कोरोनाबाट ज्यान गुमाउनेको संख्या ८ हजार ७ सय ७२ पुगेको छ।
काठमाडौं उपत्यकामा पनि संक्रमण घट्दै गएको छ। पछिल्लो २४ घण्टामा उपत्यकामा ३७९ कोरोना संक्रमित फेला परेका छन्। जसमा काठमाडौंमा २८५, भक्तपुरमा ३३ र ललितपुरमा ६१ संक्रमित थपिएको स्वास्थ्य मन्त्रालयले जनाएको छ।