उच्च गर्मीको चपेटामा अमेरिकाको पश्चिम क्षेत्र, १२४ डिग्री फरेनहाइटसम्म तापक्रम मापन
प्रकाशित मिति : असार २, २०७८ बुधबार
विगतका कैयन रेकर्डहरु समेत तोड्दै अमेरिकाको पश्चिम क्षेत्रमा उच्च गर्मी सुरु भएको छ । मंगलबार साल्ट लेक सिटी लगायतका कैयन सिटीहरुमा तापक्रम उच्च भयो भने दक्षिणपश्चिम क्षेत्रका कैयन सिटीहरु उच्च तापक्रमको चपेटामा परे ।
पश्चिम क्षेत्रका झण्डै ४० मिलियनले एकसयडिग्री फरेनहाटइभन्दा उच्च तापक्रमको सामना गर्नुपर्ने अवस्था रहेको छ भने कतिपय सिटीहरुमा तापक्रम ११० डिग्री फरेनहाइटसम्म पुग्दैछ । क्यालिफोर्नियाका कैयन स्थान र दक्षिणपश्चिम क्षेत्रमा कैयन भागमा बुधबारदेखि शुक्रबारसम्म उच्च गर्मी हुने जनाइएको छ । जसले विगतका रेकर्डसमेत तोडिने छन् ।
क्यालिफोर्निया, एरिजोना, युटाह र मोन्टाना लगायतका क्षेत्रमा जंगलमा लागेको आगोका कारण अझ तातोको सामना गर्नुपर्ने र हड्डी सुकाउने सापेक्षित आद्रताको सामना गर्नुपर्ने सम्भावना रहेको छ । लास भेगासमा कार्यालय रहेको राष्ट्रिय मौषम सेवाले यो स्तरको अत्यन्तै खरतनाक रहेको भन्दै सर्वसाधारणहरुलाई चिसोमा बस्न सुझाव दिएको छ ।
मंगलबार साल्ट लेक सिटीको तापक्रम १०७ डिग्री फरेनहाइट पुगेको थियो भने डेनभरको तापक्रम १०१ डिग्री फरेनहाइट पुग्यो । डेनभरमा सन् १९५२ र सन् १९९३ मा दिउसोको तापक्रम ९७ डिग्री फरेनहाइटसम्म पुगेकोमा उक्त रेकर्ड तोडिएको छ ।
मोन्टानाको बिलिंग्समा मंगलबार तापक्रम १०८ डिग्री फरेनहाइटसम्म पुग्यो । सन् २००२ को जुलाई १४ मा पनि यो सिटीमा १०८ डिग्री फरेनहाइटसम्म तापक्रम पुगेको थियो । वायोमिंगको लारोमीमा ९४ डिग्री फरेनहाइट तापक्रम पुग्दा शेरिडनमा रेकर्ड तोड्दै १०७ डिग्री फरेनहाइटसम्म ताफक्रम पुग्यो । क्यास्परमा १०१ डिग्री तापक्रम पुगेको छ ।
क्यालिफोर्नियाको डेथ भ्यालीमा १२४ दशमलव १ डिग्री फरेनहाइट तापक्रम मापन गरिएको छ भने निडल्समा १२१ डिग्री फरेनहाइट तापक्रम मापन गरिएको छ । त्यस्तै क्यालिफोर्नियाकै पाल्म स्प्रींगमा १२१ डिग्री फरेनहाइटसम्म तापक्रम पुगेको छ । लस भेगासमा तापक्रम ११४ डिग्री फरेनहाइटसम्म पुगेको छ । सन् १९४० मा लस भेगासमा ११६ डिग्री पुगेको थियो ।
एरिजोनाको फिनिक्समा तापक्रम ११५ डिग्री फरेनहाइट पुगेको छ । सन् १९७४ को रेकर्डलाई म्याच गर्दै यो बिन्दुमा तापक्रम पुगेको हो । बुधबारपनि यी क्षेत्रहरुको तापक्रम उच्च मापन गरिएको छ ।