ग्रिनकार्ड, वर्कपरमिट लगायतका अध्यागमन आवेदन ५ श्रेणीमा परेमा शीघ्र निर्णय, मापदण्ड अपडेट
कैयन प्रकारका आवेदनमा निर्णय गर्न युएससीआईएसले लामो समय लगाइरहेको सन्दर्भमा निश्चित प्रकारका आवेदनमा छिटो फैसला दिने नीति पुनस्र्थापना गरिएको छ । आवेदनबारे शीघ्र निर्णयका मापदण्ड र अवस्थाहरुबारे आज युएससीआईएसले नीति अपडेट गरेको हो ।
नयाँ नीति अनुशार युएससीआईएसले कुन आवेदनमा शीघ्र फैसला आवश्यक छ भन्ने निर्धारण गर्नका लागि नयाँ मापदण्डहरुको प्रयोग गर्ने भएको छ । युएससीआईएसले नीति निर्देशिकामा कस्ता कस्ता मापदण्डहरु पूरा गरेको खण्डमा आवेदन शीघ्र निर्णयको लागि योग्य हुन्छ भन्ने स्पष्ट पारेको छ ।
अमेरिकामा अध्यागमन सुविधाका लागि आवेदन दिएकाहरुले आफ्नो आवेदनबारे शीघ्र निर्णयका लागि अनुरोध गर्नसक्ने प्रावधान रहेको छ । तर युएससीआईएसले हरेक केस अनुशार त्यस्ता अनुरोधबारे निर्णय लिने गर्छ । र मापदण्ड पूरा गरेकाहरुलाई शीघ्र फैसला दिने गर्छ ।
नयाँ नीति अनुशार आईआरएसबाट गैर नाफामुलक संस्थाका रुपमा मान्यता पाएका संस्थाका तर्फबाट अमेरिकाको सामाजिक र सांस्कृतिक रुचीमा पर्ने आवेदनबारे शीघ्र फैसलाका लागि अनुरोध गर्नसक्ने प्रावधानलाई पुनस्थापना गरेको छ । त्यस्ता आवेदनमा अतिरिक्त शुल्क तिरेर प्रिमियम प्रोसेस गर्नसक्ने प्रावधान भएपनि नियमित आवेदनमा समेत युएससीआईएसले शीघ्र निर्णय दिनेछ ।
अपडेट गरिएको नीति विस्तारमा यहाँ पढ्न सक्नुहुनेछ ।
देशनिकालाका प्रकृयामा रहेका वा देशनिकालाको अन्तिम आदेश पाएकाहरुका सन्दर्भमा कुनै अध्यागमन सुविधाका लागि गरिएको अनुरोधमा शीघ्र प्रकृया गर्दा युएससीआईएस र आइसबीचको समन्वयमा गरिनेसमेत स्पष्ट पारिएको छ ।
विभिन्न ५ प्रकारका मापदण्ड पूरा गरेका आवेदनका सन्दर्भमा युएससीआईएसले शीघ्र निर्णय दिने नीति रहेको छ ।
यदि व्यक्ति वा कम्पनीलाई गम्भिर प्रकारको आर्थिक क्षति हुने अवस्था भएको खण्डमा समयमा फाइल गरिएका आवेदनका सन्दर्भमा युएससीआईएसले शीघ्र निर्णय दिनसक्नेछ । यो मापदण्ड अनुशार कम्पनीले केसबारे छिटो निर्णय नभए गम्भीर आर्थिक क्षति भोग्नुपर्ने, कम्पनी असफल हुने, महत्वपूर्ण सम्झौता गुम्ने वा अन्य कर्मचारीहरूलाई हटाउनुपर्ने अवस्था आउनसक्ने अवस्था प्रमाणित गर्न सक्नुपर्छ ।
उदाहरणका लागि कुनै मेडिकल अफिसमा डाक्टरको वर्क परमिटको अवधि खाली हुन गएमा उसका सहायकहरुले समेत काम छाड्नुपर्ने अवस्था आएमा शीघ्र निर्णयको योग्यताभित्र पर्नेछ । तर एक्लै काम गर्नका लागिमात्र आवेदकलाई वर्क परमिट आवश्यक पर्ने र कम्पनी वा अन्य व्यक्तिलाई नोक्सान नहुने भएमा भने शीघ्र निर्णयको योग्यता नपुग्नसक्छ ।
त्यस्तै आपतकालिन वा जरुरी मानवीय कारणहरु रहेको खण्डमा पनि आवेदनमा शीघ्र निर्णयको अनुरोध गर्न सकिन्छ । उदाहरणका लागि यदि व्यक्ति सिकिस्तै बिरामी भएको खण्डमा उपचारका लागि यात्रा गर्न महत्वपूर्ण आवश्यकता भएमा यो मानवीय कारणमा पर्नसक्छ ।
गैर नाफामुलक संस्थाका रुपमा मान्यता पाएका संस्थाका तर्फबाट अमेरिकाको सामाजिक र सांस्कृतिक रुचीमा पर्ने आवेदनबारे शीघ्र निर्णय गर्न सकिने प्रावधान आजबाट थपिएको हो । युएससीआईएसले प्रिमियम प्रोसेसको सुविधा भएका आवेदनमा सामान्यतया शीघ्र निर्णयको अनुरोध स्वीकार नगर्ने भएपनि गैर नाफामुलक संस्थालाई भने छुट दिइएको छ ।
अमेरिकाका रक्षा मन्त्रालय, श्रम मन्त्रालय, गृहमन्त्रालय वा सार्वजनिक सुरक्षा तथा राष्ट्रिय सुरक्षाका सन्दर्भमा जरुरी आवेदनहरु भएमा पनि युएसीआईएसले शीघ्र निर्णय दिनेछ । अमेरिकी सरकारको रुचीमा पर्ने त्यस्ता आवेदनहरु शीघै निर्णयका लागि योग्य हुन्छन् ।
त्यस्तै युएससीआईएसको गल्तीको मापदण्डभित्र पर्ने आवेदनहरु पनि शीघ्र निर्णयका लागि योग्य हुनेछन् ।
आवेदनबारे शीघ्र निर्णयका लागि कसरी अनुरोध गर्ने भन्नेबारे थाहा पाउन यहाँ क्लीक गर्नुहोला ।
