इटलीमा गएको शक्तिशाली भूकम्पमा ज्यान गुमाउनेको संख्या बढ्दै, १५९ को मृत्यु , सयौं घाइते
प्रकाशित मिति : भाद्र ९, २०७३ बिहीबार
इटलीमा गएको शक्तिशाली भूकम्पमा ज्यान गुमाउनेहरुको संख्या १५९ पुगेको र सयौं घाइते भएको जनाइएको छ । भूकम्पमा हजारौं घरबारबिहिन भएको रोयटर्सले जनाएको छ । मध्य इटलीमा गएको भूकम्प ६ दशमलव २ रेक्टर स्केलको भएको युएस जिओलोजिकल सर्भेले जनाएको छ । भूकम्पमा कैयन व्यक्ति भत्केका घरहरुभित्र फसेका थिए ।
स्थानीय समय अनुशार विहान ३ बजेर ३६ मिनेटमा भूकम्प गएको थियो ।
मध्य इटालियन शहर अकुमोलीमा पुरिएर एउटै घरका चारजनाको ज्यान गएको छ । ९ बर्ष र ८ महिनाका दुईजना बच्चाहरु उनीहरुका बाबुआमासँगै घरभित्र पुरिएका थिए । उद्दारकर्ताहरुले ८ महिनाको बच्चालाई कम्बलमा बेरेको अवस्थामा शव फेला पारेका थिए । बालककी हजुरआमाले रुदै भनिन् – ‘भगवानले सबैजनालाई एकैपटक लग्यो ।’
उद्दारका लागि सरकारले २६५ मिलियन डलरको आपतकालिन रकम निकाशा गरेको छ भने सेना परिचालन गरिएको छ । भूकम्पबाट इटलीका कैयन ऐतिहासिक शहरहरु ध्वस्त भएका छन् । अकुमोलीका मेयरका अनुशार त्यसक्षेत्रमा २५ सय भन्दा धेरै व्यक्ति घरबारबिहिन भएका छन् ।
ठूलो भूकम्पको झण्डै एकघण्टापछि ५ दशमलव ५ म्याग्निच्युटको पराकम्प गएको थियो । त्यसपछि झण्डै ६० वटा पराकम्पनहरु गइसकेका छन् । सन् २००९ मा इटलीमा गएको भूकम्पमा ३ सय भन्दा धेरैको ज्यान गएको थियो ।
तस्विरहरु : रोयटर्स