सगरमाथा आरोहणका क्रममा तस्बिर र भिडियो खिच्न कडाइ
प्रकाशित मिति : चैत्र ९, २०७७ सोमबार
पर्यटन विभागले सगरमाथा आरोहणका क्रममा तस्बिर र भिडियो खिच्न प्रतिबन्ध लगाएको छ। आरोहणका दौरान अन्य गतिविधि बढेको भन्दै विभागले तस्बिर र भिडियो खिच्न तथा त्यसलाई प्रकाशन, प्रसारण गर्न कडाइ गरेको हो।
आरोहीले हिमालमा आफ्नो आरोहण दलका गतिविधिका तस्बिर र भिडियो खिच्न भने सक्नेछन्। तर ती सामग्री अन्य प्रयोजनका लागि प्रयोग गर्न पाइनछैन। आरोहण गतिविधिवाहेक अन्य प्रयोजनका लागि विभागबाट पूर्व जानकारी लिनुपर्ने विभागले जनाएको छ।
यो यामको आरोहण आगामी मेको पहिलो साताभित्र सुरु हुने विभागको अनुमान रहेको विभागको पर्वतारोहण शाखाकी निर्देशक आचार्यले बताइन्।
आरोहणलाई व्यवस्थित र गुणस्तरीय बनाउन विभागले आरोहण इतिहासमै पहिलोपटक चिकित्सकलाई सगरमाथाको आधार शिविरमै खटाएको छ। यसअघिका आरोहणमा पनि चिकित्सकको व्यवस्था हुने भए पनि उनीहरु सम्बन्धित स्थानमा पुग्दैनथे। सम्पर्क अधिकृत पनि सम्बन्धित गन्तव्यमा नपुग्ने, बीचबाटै फर्किनेलगायतमा समाचार आएका थिए।
विभागले स्वास्थ्य सेवा विभागअन्तर्गतका दुई चिकित्सकलाई काजमा सगरमाथाको आधार शिविरमा खटाएको हो।
वसन्त आरोहणका लागि अनुमति लिएका आरोही गन्तव्यतिर लागिसकेका छन्। आरोहणका लागि बाटो बनाउने आइसफल चिकित्सक पनि गन्तव्यमा रहेको विभागले जनाएको छ। आइसफल चिकित्सक सगरमाथाको आधार शिविरभन्दा माथितिर पुगिसकेका छन्। वसन्तयामको आरोहणका लागि विभागले धमाधम आरोहण अनुमति जारी गरिरहेको छ। हालसम्म मनास्लु, लुबुचेलगायत हिमाल आरोहणका लागि आरोही समूह गन्तव्यतर्फ निस्किएका छन् ।
सरकारले आरोहणका लागि ४१४ हिमाल खुला गरेको छ। अझै आरोहणयोग्य एक हजार ३०० भन्दा बढी हिमाल रहेको बताइन्छ। नेपाल पर्वतारोहण सङ्घका पूर्वअध्यक्ष आङछिरिङ शेर्पाका अनुसार हालसम्म आठ हजारभन्दा बढीले सगरमाथा आरोहण गरिसकेका छन्। व्यक्तिगतरूपमा मात्रै पाँच हजारको हाराहारीले आरोहण गरेका छन्।