न्युयोर्क निवासी महर्जन दम्पत्तिबाट १० हजार डलर अष्टमाया फाउण्डेशनमार्फत सामाजिक कार्यमा
प्रकाशित मिति : फाल्गुन २४, २०७७ सोमबार
न्युयोर्क निवासी सामाजिक व्यक्तित्व तथा व्यवसायी समिर महर्जन र सूर्य महर्जनले महिलाको दिगो आर्थिक शशक्तिकरणका लागि क्वीन्स डायमण्डका तर्फबाट अष्टमाया फाउण्डेशनलाई १० हजार डलर डोनेशन गर्नुभएको छ । आज अन्तर्राष्ट्रिय महिला दिवशको अवशरमा फाउण्डेशनको सुरुवात गर्दै १० हजार डलर डोनेशन गरिएको हो ।
नेपालमा महिलाको दिगो आर्थिक शशक्तिकरणका लागि फाउण्डेशनले काम गर्ने र फाउण्डेशन आफ्नी आमा अष्टमाया महर्जनप्रति समर्पित रहेको समिर महर्जनले जानकारी दिनुभयो । आफ्नो व्यवसायलाई परोपकारी कामसँग संगठित रुपमा नै जोडेर अगाडि बढाउन पाउँदा आफू निकै उत्साहित रहेको उहाँले बताउनुभयो ।
आर्थिक शशक्तिकरण विना महिलामाथिको विभेद अन्त्य गर्न नसकिने र परिवारबाटै शशक्तिकरणको सुरुवात हुनुपर्ने बताउँदै आफ्नो शशक्तिकरणका लागि सासुको भूमिकाको सूर्य महर्जनले स्मरण गर्नुभयो । परिवारबाटै प्राप्त सहयोगले आफू सक्षम बन्न सकेको बताउँदै उहाँले सासुकै नाममा स्थापित फाउण्डेशनबाट सामाजिक क्षेत्रमा केही योगदान दिने प्रयास सुरु गरेको जानकारी दिनुभयो ।
सामाजिक अभियन्ता डाक्टर विष्णुमाया परियार र शेर्पा किदुगकी नवनिर्वाचित अध्यक्ष छिरिङ शेर्पाले न्युयोर्कको ज्याक्सनहाइटमा आयोजित कार्यक्रममा फाउण्डेशनको उद्घाटन गर्नुभएको थियो । उहाँहरु दुबैजनाले महर्जन दम्पत्तिले विगतमा सामाजिक क्षेत्रमा गर्दै आएको योगदानको प्रशंसा गर्दै अब संगठित रुपमा नै सामाजिक काम गर्न लागेकोमा शुभकामना दिनुभयो । न्युयोर्कमा आप्रवासीको अधिकारका लागि कृयाशिल संस्था अधिकारमा सकृय सामाजिक अभियन्ता नर्बदा क्षेत्रीको लिखित शुभकामना पढेर सुनाइएको थियो ।
कार्यक्रममा क्वीन्स डायमण्ड एण्ड ज्वेलरीका तर्फबाट सामाजिक अभियन्ता डाक्टर विष्णुमाया परियार र शेर्पा किदुगकी नवनिर्वाचित अध्यक्ष छिरिङ शेर्पालाई सामाजिक योगदानका लागि सम्मान गर्दै क्रिस्टलको टोकनसमेत प्रदान गरिएको थियो ।
फाउण्डेशनको उद्घाटनपछि क्वीन्स डायमण्ड एण्ड ज्वेलरीको लक्जरी स्टोरको समेत उद्घाटन गरिएको थियो । झण्डै १२ बर्ष अगाडि अमेरिकाको न्युयोर्कमा समिर महर्जन र सूर्य श्रेष्ठ महर्जनको जोडीले क्वीन्स डायमण्ड एण्ड ज्वेलरी स्टोरको स्थापना गरेकोमा आज त्यसको लक्जरी स्टोर समेत सुरुवात गरिएको हो ।