नेकपा आधिकारिकता : ओली पक्षले कार्यान्वयन गर्ने, प्रचण्ड–माधव पुनरावलोकनमा जाने तयारीमा
प्रकाशित मिति : फाल्गुन २३, २०७७ आईतबार
नेपाल कम्युनिष्ट पार्टी (नेकपा) को आधिकारिताबारे सर्वोच्च अदालतले आइतबार दिएको फैसलाका बारेमा केपी ओली तथा प्रचण्ड–नेपाल पक्ष आ–आफ्नै रणनीतिमा जुटेका छन्।
फैसलाका बारेमा प्रचण्ड–माधव पक्षले आइतबार साँझ कानुन व्यवसायीहरुसँग छलफल गरेका थिए। उनीहरुले फैसलाविरुद्ध पुनरावलोकनमा जान सुझाव दिएका छन्। सो छलफलमा टीकाराम भट्टराई, रमण श्रेष्ठ, मुक्ति प्रधानलगायतका कानुन व्यवसायीहरु सहभागी थिए।
उनीहरुले अदालतले राजनीतिक विषयमा प्रवेश गरेर फैसला गरेको भन्दै पुनरावलोकनमा जान सुझाएका हुन्।
कानुन व्यवसायीहरुले रिट निवेदक ऋषि कट्टेलले नेकपाको आधिकारिकताको विषयमात्रै मागेकामा सर्वोच्च अदालतले पार्टीको एकताकै विषयमा फैसला गरेको भन्दै असन्तुष्टि जनाएका थिए।
‘संवैधानिक र राजनीतिक रुपमा कार्यान्वयन नहुने फैसला भएको छ। यसलाई चित्त बुझाउन सकिँदैन। हामी निसन्देह पुनरवलोकनका लागि जान्छौं,’ वरिष्ठ अधिवक्ता मुक्ति प्रधानले सञ्चारकर्मीसँग भने।
प्रचण्ड–माधव पक्षले सोमबार स्थायी कमिटी बैठक बसेर फैसलाबारे औपचारिक धारणा सार्वजनिक गर्नेछ।
प्रचण्ड–माधव समूहका प्रवक्ता नारायणकाजी श्रेष्ठले आइतबार राति ट्वीट गर्दै नेकपाको नाम विवादसम्बन्धी सर्वोच्चको फैसला सोच्नै नसक्ने खालको रहेको टिप्पणी गरेका छन्। यो फैसलाले ‘कमन सेन्स’ भएका सवैलाई आश्चर्यचकित र स्तब्ध बनाएको उनको भनाइ छ। रिट निवेदकको मागदावीभन्दा बाहिर गएर सरोकारै नभएको असम्बन्धित विषयमा प्रवेश गरेर सर्वोच्च अदालतले फैसला गरेको उनको जिकिर छ।
उता आइतबार साँझै बसेको ओलीपक्षीय संसदीय दलको बैठकमा प्रधानमन्त्री केपी ओलीले फैसला आफ्नो विपक्षमा आएको भए पनि त्यसलाई सम्मान गरेर जाने बताएका थिए। ओलीपक्षले भने पुनरावलोकनको विषय उठाएन। बैठकपछि नेता खिमलाल भट्टराईले फैसला कार्यान्वयनका पक्षमा अगाडि बढ्ने बताए। बैठकमा ओलीले अब पूर्वएमालेको बैठक बोलाएर अगाडि बढ्ने जानकारी दिएका थिए।