भिसा नपाएका डिभी २०२० का नेपाली विजेता झण्डै २३ सय


प्रकाशित मिति : फाल्गुन १३, २०७७ बिहीबार

आर्थिक बर्ष २०२० का लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये झण्डै साढे १३ सय जना प्राथमिक डिभी विजेताहरुलेमात्र अमेरिकाको भिसा प्राप्त गर्न सफल भए । अमेरिका आउने आशामा रहेका बाँकी झण्डै २३ सय नेपालीहरुको आशा भने अझै मरेको छैन ।

सन् २०२० को सेप्टेम्बर ३० अगाडि भिसा नपाएका आर्थिक बर्ष सन् २०२० का डिभी विजेताहरुले भने अब भिसा नपाउने अमेरिकी सरकारको विदेश मन्त्रालय ब्यूरो अफ कन्सुलरले एक सुचना जारी गरेर स्पष्ट पारेको छ । उनीहरुको अन्तरवार्ता तय नगरिने, अन्तरवार्ताको मिति नदिइने र भिसा जारी नगरिने अमेरिकी विदेश मन्त्रालयले स्पष्ट पारेको हो । तर अदालतले ९०९५ भिसा छुट्याउन आदेश दिएकाले मुद्दा जितेमा भिसा पाइएला कि भन्ने आशा अझै मरेको छैन ।

उनीहरुमध्ये कतिपयको त भिसाका लागि अन्तरवार्ताको मिति समेत तय भइसकेको थियो । उनीहरु अमेरिका आउन पाउनेमा लगभग ढुक्क रहेका थिए । तर कोरोना महामारी र ट्रम्पको कार्यकारी आदेशका कारण अन्तरवार्ता हुन सकेको थिएन ।

अमेरिकी विदेशमन्त्रालयबाट जारी सुचनाको स्क्रीनशट

ट्रम्पले कार्यकारी आदेशमार्फत सन् २०२० को भिसाको औचित्य समाप्त गरेकोमा संघीय अदालतले त्यसको बिरुद्धमा फैसला गरेपछि सेप्टेम्बरमा सयौ नेपालीहरुले डाइभर्सिटी भिसा प्राप्त गरेका थिए । तर पनि झण्डै तीनसाताको अवधिमा ठूलो संख्यामा रहेका नेपाली डिभी विजेताले भिसा पाउन सकेनन् ।

अदालतको आदेशपछि सन् २०२० का डिभी विजेता ४०४ जना नेपालीहरुले भिसा पाउन सफल भएका थिए । जसमध्ये २२५ जना प्राथमिक डिभी विजेता नेपाली रहेका थिए भने १०५ जना उनीहरुका दम्पत्ति थिए । त्यस्तै ७४ जना उनीहरुका छोराछोरीहरु रहेका थिए ।

काठमाडौंमा रहेको अमेरिकी दूतावासलेमात्र सेप्टेम्बरमा ३७९ जना डिभी विजेताहरुलाई भिसा जारी गरेको थियो । जसमध्ये २१२ जना प्राथमिक डिभी विजेताहरु, ९५ जना उनीहरुका दम्पत्ति र ७२ जना उनीहरुका छोराछोरीहरु रहेका थिए । अदालतको आदेशपछि आफूहरुले सकेजतिलाई भिसा जारी गरेको काठमाडौंस्थीत नेपाली दूतावासले जनाएको थियो ।

यद्यपी आर्थिक बर्ष २०२० का डिभी विजेताहरुमा भिसा पाउनेहरुको तुलनामा नपाउनेहरुको संख्या बढी छ । अब अमेरिकी दूतावास र कन्सुलेटहरुले सन् २०२० को नभई आर्थिक बर्ष २०२१ का डिभी विजेताहरुको भिसा जारी गर्न सुरु गर्ने भएका छन् ।

सन् २०२१ का लागि डिभी विजेता नेपालीहरुको संख्या भने ३८०१ रहेको छ ।  सन् २०२१ का डिभी लोटरी पारेकाहरुले गत अक्टोबर १ देखि भिसा पाउन सुरु गर्ने नियम भएपनि  ट्रम्पको आव्रवासन रोकका कारण भिसा पाउन सकेका थिएनन् । तर अब भने उनीहरुले पनि भिसा पाउने भएका छन् ।

सन् २०२१ का डिभी विजेताहरुमा नेपाल एसियामा दोश्रो भएको छ । सबैभन्दा धेरै डिभी विजेताहरु इरानका ६ हजार १ जना रहेका छन् । सन् २०२१ का लागि विश्वमै सबैभन्दा धेरै डिभी विजेताहरु भने इजिप्टका ६ हजार २ जना रहेका छन् । त्यस्तै अल्जेरियाका ६ हजार १ जना र सुडानका ६ हजार १ जना रहेका छन् ।

आर्थिक बर्ष २०२२ का गत अक्टोबर ७ देखि डिभीका लागि आवेदन खुलेकोमा नोभेम्बर १० सम्म डिभी लोटरी भरिएको थियो । यो डिभीको नतिजा भने सन् २०२१ को मे ८ मा सार्वजनिक हुनेछ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com