चौतर्फी आलोचनापछि बोली सच्याउँदै ओलीले भने-न्यायालयलाई धम्की दिएको छैन
प्रकाशित मिति : फाल्गुन १०, २०७७ सोमबार
न्यायालयलाई धम्की दिएको भन्दै चौतर्फी आलोचना भइरहेका बेला प्रधानमन्त्री केपी ओलीले सोमबार कञ्चनपुर पुगेर आफ्ना अभिव्यक्तिको बचाउ गरेका छन्। उनले गत शनिबार विराटनगरमा आयोजित सभालाई सम्बोधन गर्दै आफ्नो पक्षमा फैसला नआए आन्दोलन हुन्छ भन्ने अभिव्यक्ति दिएपछि विभिन्न राजनीतिक दल तथा नागरिक समाजले आलोचना गरेका थिए।
तर सोमबार कञ्चनपुरमा औद्योगिक क्षेत्र शिलान्यासपछि बोल्दै ओलीले आफूले न्यायालयलाई नधम्काएको बताए। उनले विराटनगरको अभिव्यक्ति यसरी सच्याए–‘संसद पुन:स्थापना नभए केहीलाई राजनीति सक्किने चिन्ता बढेको होला, तर हामीलाई त्यसो चिन्ता छैन, हाम्रो विकासको आन्दोलन जारी रहनेछ, मैले संसद पुन:स्थापना भए पनि विकासको आन्दोलन हुन्छ भनेको हुँ ।’
उनले न्यायालयलाई धम्की दिने आफ्नो बानी नभएको बताए। ‘स्वतन्त्र न्यायालय र शक्ति पृथकीकरणको सिद्धान्तलाई मैले सदैव मानेको छु’ ओलीले भने, ‘अदालतको निर्णय गलत हुन सक्छ, त्यस्तो अवस्थामा पुनरावलोकन गर्न सकिन्छ, तर धम्किदिने काम कहिल्यै गरिंदैन।’
उनले विराटनगरको सभामा भनेका थिए– ‘चुनाव हुन्छ नै, त्यसकारण तपाईंहरु त्यो आत्मविश्वासका साथ अगाडि बढ्नुस्, यदि कहीँ कुनै प्रकारको जालझेल, षडयन्त्र, तिकडम, सेटिङ केही भएर देश र जनताको पक्षमा फैसला हुन्छ भने आन्दोलन फेरि पनि अगाडि बढ्छ। फेरि पनि हामी त्यस्ता शक्तिलाई पराजित गर्छौं।’
निर्मलाका हत्यारा पत्ता लगाउन निर्देशन
कञ्चनपुरको सभामा उनले बलात्कारपछि हत्या गरिएकी कञ्चनपुरकी १३ वर्षीया निर्मला पन्तका हत्यारा पत्ता लगाउन प्रहरीलाई निर्देशन पनि दिए।
‘भागरथी प्रकरणमा पनि राजनीति घुसाउने दुस्प्रयत्न गरिएको थियो’ प्रधानमन्त्री ओलीले भने,‘तर प्रहरीले त्यो प्रयास विफल बनायो, म धन्यवाद दिन चाहन्छु।’
उनले भागरथी प्रकरणजस्तै कसैको दबाबमा नपरी स्वतन्त्र ढंगले अनुसन्धान गर्दै निर्मला पन्तका हत्यारा पत्ता लगाउन प्रहरीलाई निर्देशन दिए।