बाइडेन प्रशासनको २ साता नपुग्दै सयौं देशनिकाला
प्रकाशित मिति : माघ १९, २०७७ सोमबार
बाइडेन प्रशासनको २ साता नपुग्दै अमेरिकाबाट सयौं देशनिकालामा परेका छन् । राष्ट्रपति जो बाइडेनले आफ्नो प्रशासनको सुरुका दिनमा देशनिकाला रोक्ने प्रतिबद्धताका बाबजुत उनीहरुलाई देशनिकाला गरिएको हो ।
बाइडेन प्रशासनले एकसय दिनका लागि देशनिकाला स्थगित गर्ने घोषणा गरेको थियो । तर संघीय न्यायाधिसले गत साता एक आदेश जारी गर्दै देशनिकाला स्थगित गर्ने बाइडेन प्रशासनको घोषणालाई केहीदिनका लागि कार्यान्वयनमा रोक लगाए । तर अदालतले सरकारलाई देशनिकालाको तालिका तय गर्न बाध्य पारेको थिएन ।
बाइडेनले कार्यभार सम्हालिसकेपछि आइसले अमेरिकाबाट कम्तीमा तीनदेशका नागरिकहरुलाई देशनिकाला गरेको छ । बिहिबार १५ जनालाई जमैका र शुक्रबार २६९ जनालाई ग्वाटेमाला र होण्डुरस देशनिकाला गरिएको छ ।
आज सोमबारका लागि पनि अरु देशनिकालाका उडानहरु तय गरिएको थियो । तर आज कतिजनालाई देशनिकाला गरियो भन्नेबारे स्पष्ट छैन । देशनिकाला गरिएकाहरुमध्ये कतिजनालाई राष्ट्रिय सुरक्षा र जन सुरक्षामा खतरा रहेको ठहर गरिएको थियो भन्ने स्पष्ट छैन । त्यस्तै हालै सिमाना पार गरेकाहरु कतिजना थिए भन्ने पनि स्पष्ट छैन ।
डिपार्टमेन्ट अफ होमल्याण्ड सेक्युरिटीले देशनिकालाको प्राथमिकतामा राष्ट्रिय सुरक्षा र जन सुरक्षामा खतरा रहेकाहरु तथा हालैमात्र सिमाक्षेत्रबा गैरकानूनी रुपमा छिरेकाहरुलाईमात्र राखिएको छ ।
शुक्रबार देशनिकाला गरिएकी एउटा महिला सन् २०१९ मा २२ जनाको ज्यान जानेगरी भएको गोलीकाण्डकी प्रत्यक्षदर्शी समेत थिइन् । उनले बन्दुकधारीबिरुद्ध प्रत्यक्षदर्शीका रुपमा बयान दिने सहमति जनाएकी थिइन् ।
उनलाई विगतमा ट्राफिक नियम उल्लंघन गरेको आरोपमा बुधबार नियन्त्रणमा लिइएको थियो । त्यसपछि उनलाई वकिललाई समेत सम्पर्क गर्न नदिई देशनिकाला गरिएको जनाइएको छ । ती महिलालाई बुधबार एल पासोको जेलमा राखिएको रेकर्डले देखाएको छ ।
ती महिलाले सन् २०१८ मा मादकपदार्थ सेवन गरेको गाडी चलाएको अभियोग स्वीकारेकी थिइन् । उनलाई जनसुरक्षामा खतरा नरहेको भन्दै त्यहीबेला रिहा गरिएको थियो ।
होण्डुरसका अधिकारीहरुले शुक्रबार अवतरण गरेको देशनिकालाको उडानमा १३१ जना रहेको पुष्टी गरेका छन् । त्यस्तै ग्वाटेमालामा अवतरण गरेको अर्को उडानमा १३८ जना रहेको र सोमबार ३० जनालाई ग्वाटेमाला देशनिकाला गरिएको त्यहाँका अधिकारीहरुले जनाएका छन् ।