विदेशको नागरिकता लिएका नेपालीलाई विनाशर्त अन अराइभल भिसा
प्रकाशित मिति : माघ १९, २०७७ सोमबार
विदेशको नागरिकता लिएका नेपालीहरुलाई नेपाल प्रवेश गर्दा त्रिभुवन अन्तर्राष्ट्रिय विमानस्थलमा अब विनाशर्त अन अराइभल भिसा प्रदान गरिने भएको छ । अध्यागमन विभागले एक सुचना प्रकाशित गरी राहदानीमा जन्मस्थान नेपाल उल्लेख भएका नेपाली मूलका विदेशी, नेपालीसँग नातासम्बन्ध भएका र गैर आवासीय नेपाली नागरिकलाई अन अराइभल भिसा दिने उल्लेख गरेको छ ।
एनआरएनए अध्यक्ष कुमार पन्तले आफूहरुको बारम्बारको अनुरोधपछि सरकारले गैरआवासीय नेपालीका लागि त्रिभुवन अन्तर्राष्ट्रिय विमानस्थलमा बिनाशर्त अनअराइभल भिसा खुला गरेको जानकारी दिएका छन् । उनले स्वास्थ्य सुरक्षाका लागि प्रयाप्त सावधानी अपनाएर यात्रा गर्न अनुरोध गरेका छन् ।
उनले भनेका छन् -‘हाम्रो बारम्बारको अनुरोधपछि सरकारले गैरआवासीय नेपालीका लागि त्रिभुवन अन्तर्राष्ट्रिय विमानस्थलमा बिनाशर्त अनअराइभल भिसा खुला गरेको छ। स्वास्थ्य सुरक्षाका लागि पर्याप्त सावधानी अपनाएर यात्रा गर्न गैरआवासीय नेपाली समुदायमा हार्दिक अनुरोध गर्दछु । शुभ यात्रा ।’
नेपालको भिसा भएका विदेशी नागरिकलाई आगमन अनुमति दिइने तर एयरपोर्टमा अन अराइभल भिसा नदिइने अधयागमन विभागले जनाएको छ । भिसा नभएका विदेशीहरुले विदेशमा रहेका नेपालस्थीति नियोगबाट भिसा प्राप्त गरेर नेपाल आउन सक्नेछन् । भिसा लिइ आउन सम्भव नभएमा सम्बन्धित सरकारी निकायको सिफारिस वा पूर्व स्वीकृति पेश गरेमामात्र अन अराइभल भिसा दिइने जनाइएको छ ।
सबै विदेशी यात्रुहरुले यात्रा सुरु गर्नुभन्दा बढीमा ७२ घण्टाभित्रको नेगेटिभ कोरोना रिपोर्ट पेश गर्नुपर्नेछ । तर ५ बर्षभन्दा कम उमेरकाहरुका लागि त्यस्तो रिपोर्ट आनिवार्य हुनेछैन । सबै यात्रुहरुले नेपाल सरकारले तोकेका क्वारेन्टीनका नियमहरु र स्वास्थ्यमापदण्डहरुको पालना गर्नुपर्ने जनाइएको छ ।
यात्रा अनुमतिपत्र वा आकस्मिक राहदानी बाहकलाई पोर्ट अफ इन्ट्रीमा अन अराइभल भिसा नदिइने जनाइएको छ ।