न्युयोर्क सिटी, लङ आइल्याण्ड र न्युजर्सीका युएससीआईएस अफिस भोलिपनि बन्द
प्रकाशित मिति : माघ १९, २०७७ सोमबार
आजको अपडेट समाप्त भएको छ । थप अपडेटका लागि यहाँ क्लीक गर्नुहोला ।
5:35PM (EST):न्युयोर्क र न्युजर्सीका युएससीआईएस फिल्ड अफिस, एसाइलम अफिस र एप्लीकेशन सपोर्ट सेन्टर भोलिपनि बन्द हुने
न्युयोर्क सिटी क्षेत्र र लङ आइल्याण्डमा रहेका युएससीआईएसका फिल्ड अफिस, एसाइलम अफिस र एप्लीकेशन सपोर्ट सेन्टरहरु भोलिपनि बन्द हुने भएका छन् । हिमपातका कारण कार्यालय संचालन गर्न नसकिएको युएससीआइएसले जनाएको छ ।
न्युजर्सीका सबै युएससीआईएस अफिसहरु भोलि समेत बन्द हुने भएका छन् । फिल्ड अफिस, एसाइलम अफिस र एप्लीकेशन सपोर्ट सेन्टरहरु बन्द हुँदा बायोमेट्रिकदेखि अन्तरवार्ता लगायत सबै स्थगित भएका छन् । भोलि म्यानहटनमा रहेको नेवार्क एसाइलम अफिस पनि बन्द हुनेछ ।
न्युयोर्कको अल्बानीमा रहेको फिल्ड अफिस र एप्लीकेशन सपोर्ट सेन्टर भने भोलि विहान १० बजेदेखि खुल्नेछ ।
4:30PM (EST):जोन अफ केनेडी अन्तर्राष्ट्रिय विमानस्थलका सबै कमर्सियल उडानहरु रद्द
न्युयोर्कको जोन अफ केनेडी अन्तर्राष्ट्रिय विमानस्थलका सबै कमर्सियल उडानहरु रद्द गरिएका छन् । हिमपातका कारण मौषमको खराबीका कारण सबै उडानहरु रद्द गरिएको हो । यात्रुहरुलाई सम्बन्धित एयरलाइन्समा सम्पर्क गर्न सुझाव दिइएको छ ।
❄ #WinterStormOrlena Update:
Airline carriers at #JFK have cancelled all commercial flights for today. Please contact your airline for further information about rebooking. pic.twitter.com/QC9TVXtnXA
— Kennedy Airport. Wear a Face Covering. (@JFKairport) February 1, 2021
3:40PM (EST):न्युयोर्कको समुन्द्री तटमा पानीको सतह बढ्दै, एकइन्च बढे ब्याट्रीपार्कमा डूबान
न्युयोर्कको हडसन रिभर र समुन्द्री तटमा पानीको सतह सन् २०१२ पछिकै सबैभन्दा धेरै हुने अनुमान गरिएको छ । हिमपात र हिमआँधीका कारण पानीको सतहमा समेत बृद्धि भएको छ ।
ब्याट्रीपार्कमा आज रातीसम्म पानीको सतह ८ दशमलव ४ फिटसम्म पुग्ने अनुमान गरिएको छ । यदि ८ दशमलव ५ फिट नाघेमा पानीले ब्याट्रीपार्कको समुन्द्री पर्खाल नाघेर बाढीका रुपमा पस्न सुरु गर्नेछ ।
आज विहानमात्र हिमपात र आँधीकार कारण पानीको सतह २ देखि ३ फिटसम्म बढेको जनाइएको छ । साँझ हावाहुरी बढ्दै जाँदा त्यसमा बृद्धि हुने अनुमान गरिएको छ । त्यसो भएमा पानीको छालले ब्याट्रीपार्क नाघ्नसक्ने खतरा रहेको छ ।
अहिले अनुमान गरिएको ८ दशमलव ४ फिट पनि अहिलेसम्मकै इतिहासमा टपटेनभित्रको रेकर्ड हो । सन् २०१२ स्याण्डी आँधीको बेलामा ब्याट्रीपार्कमा पानी १४ दशमलव २ फिटसम्म पुगेको थियो ।
12:45PM (EST): स्थीति खराब बनेपछि न्युयोर्क सिटीसहित ४४ काउन्टीमा संकटकाल, २ बजेपछि बाहिर चल्ने ट्रेन बन्द
हिमपातका कारण स्थीति खराब बनेपछि न्युयोर्कका गभर्नर एन्ड्रयु कुमोले राज्यका ४४ वटा काउन्टीहरुमा संकटकालको घोषणा गरेका छन् । यसअगाडि न्युयोर्कका सिटीका मेयरले न्युयोर्कसिटीभर मौषम संकटकाल घोषणा गरेकोमा गभर्नरले न्युयोर्क सिटीसहित ४४ काउन्टीमा संकटकाल घोषणा गरेका हुन् ।
Stay home.
We have now declared a state of emergency in 44 counties statewide.
This is a dangerous storm.
— Andrew Cuomo (@NYGovCuomo) February 1, 2021
न्युयोर्क सिटीमा दिउसो २ बजेदेखि बाहिरचल्ने एमटीए ट्रेनहरु बन्द हुने भएका छन् । बसहरु अहिले पनि चलिरहेका छन् । ९० प्रतिशतभन्दा बढी उडानहरु रद्द भइसकेका छन् । लंग आइल्याण्ड रेलरोड र मेट्रो नर्थ पूरै बन्द गरिएको छ ।
The @MTA will suspend outdoor subway service starting at 2pm. Buses are running now but are subject to suspension depending on the weather.@LIRR and @MetroNorth trains will shut down this afternoon.
NYers should also plan on road closures in Westchester and Long Island.
— Andrew Cuomo (@NYGovCuomo) February 1, 2021
12:45PM (EST):न्युजर्सीमा ३४० दुर्घटना, १५ सयभन्दा बढी घरमा विद्युत आपूर्तिमा अवरोध
हिमपात र हिमआँधीका कारण न्युजर्सीमा ३४० भन्दा बढी दुर्घटनाका खबर आएका छन् । १५ सय भन्दा धेरै घरमा विद्युत आपूर्तिमा अवरोध उत्पन्न भएको छ । सुरुमा मंगलबारविहान सम्म हिमपात हुने अनुमान गरिएपनि अब मंगलबार बेलुकासम्म नै हिमपात हुने अनुमान गरिएको छ ।
गभर्नर फिल मर्फीले अत्यन्तै खराब अवस्था आउनै बाँकी रहेको बताएका छन् । अबको १२ घण्टा असाध्यै खराब हुने उनले सोमबार पत्रकार सम्मेलनमा जानकारी दिए । आज त्यहाँ सबै भ्याक्सिन केन्द्रहरु बन्द गरिएका छन् । भोलि खुल्ने नखुल्ने ठेगान छैन ।
12:26PM (EST):न्युयोर्क र न्युजर्सीका युएससीआईएस फिल्ड अफिस, एसाइलम अफिस र एप्लीकेशन सपोर्ट सेन्टर बन्द
न्युयोर्क सिटी क्षेत्र र लङ आइल्याण्डमा रहेका युएससीआईएसका फिल्ड अफिस, एसाइलम अफिस र एप्लीकेशन सपोर्ट सेन्टरहरु आज बन्द भएका छन् । हिमपातका कारण कार्यालय संचालन गर्न नसकिएको युएससीआइएसले जनाएको छ ।
न्युजर्सीका सबै युएससीआईएसफ अफिसहरु पनि बन्द भएका छन् । फिल्ड अफिस, एसाइलम अफिस र एप्लीकेशन सपोर्ट सेन्टरहरु बन्द हुँदा बायोमेट्रिकदेखि अन्तरवार्ता लगायत सबै स्थगित भएका छन् । म्यानहटनमा रहेको नेवार्क एसाइलम अफिस पनि बन्द भएको छ ।
कनेक्टिकटको फिल्ड अफिस पनि आज बन्द रहेको छ । न्यु ह्याम्पशायरको बेडफोर्ड अफिस भोलि १० बजेपछिमात्र खुल्नेछ । पेन्सिलभेनियाको फिलाडेल्फिया अफिस आज बन्द छ । मासाचुसेट्सको लरेन्स अफिस आज साढे १२ बजेपछि बन्द छ भने भोलि १० बजेपछिमात्र खुल्नेछ । यो अवधिका सबै अप्वाइन्टमेन्ट रद्द गरिएका छन् ।
12:13PM (EST):सोमबार र मंगलबार भ्याक्सिन लगाउने काम स्थगित
न्युयोर्कमा सोमबार र मंगलबार भ्याक्सिन लगाउने काम स्थगित गरिएको छ । मेयर बिल डे ब्लाजिओका अनुशार हिमआँधी र खराब मौषमका कारण भ्याक्सिन लगाउने कार्यक्रम समेत स्थगित गर्नुपरेको हो ।
भ्याक्सिनका लागि आजको मिति तय भएकाहरुले अर्को मितिका लागि अनुरोध गर्नसक्ने जनाइएको छ । भ्याक्सिन लगाउनका लागि साधनश्रोत प्रयाप्त रहेको तर भ्याक्सिन कम रहेको ब्लाजिओले बताएका छन् ।
11:10AM (EST):न्युयोर्कको हिमपातको लाइभ भिडियो
न्युयोर्कमा हिमपातको अवस्था अहिले कस्तो छ ? हेर्नुहोस् न्युयोर्कको क्वीन्स, कोरोनाबाट लाइभ ।
11:00AM (EST): लागुआर्डिया विमानस्थलबाट सबै उडान रद्द, जेएफकेका अधिकांश
हिमपात र खराब मौषमका कारण न्युयोर्कको लागुआर्डिया विमानस्थलबाट सबै उडान रद्द गरिएको छ । शक्तिशाली हिमआँधीका कारण न्युयोर्क आउने र न्युयोर्कबाट बाहिर जाने उडानहरु प्रभावित भएका छन् ।
All flight activity at #LGA has been suspended due to current weather conditions. Please contact your airline carrier for details on rebooking.
— LaGuardia Airport. Wear a Face Covering. (@LGAairport) February 1, 2021
आजका सबै ब्यापारिक उडानहरु रद्द गरिएको एयरपोर्टले ट्वीट गरेको छ । जोन अफ केनेडी अन्तर्राष्ट्रिय विमानस्थलबाट पनि ८३ प्रतिशत उडानहरु रद्द भएका छन् । दिउसोसम्म अझ धेरै उडान रद्द हुने अपेक्षा गरिएको छ ।
Airline carriers at #LGA have canceled all commercial flights for today. Please contact your airline for further information before traveling to the airport.
— LaGuardia Airport. Wear a Face Covering. (@LGAairport) February 1, 2021
नेवार्क लिबर्टी अन्तर्राष्ट्रिय विमानस्थलबाट पनि ७५ प्रतिशत उडानहरु रद्द भएका छन् । सबै यात्रुहरुलाई आफ्ना एयरलाइन्सलाई सम्पर्क गर्न सुझाव दिइएको छ ।
7:00AM (EST):हिमपात जारी, बाहिर निस्कन रोक
न्युयोर्कका मेयर बिल डे ब्लाजिओले स्थानीय संकटकालिन घुमफिर प्रतिबन्धको घोषणा गरेका छन् । आज विहान ६ बजेदेखि मंगलबार विहान ६ बजेसम्म अत्यावश्यक बाहेकका अन्य घुमफिरमा प्रतिबन्ध लगाइएको छ ।
स्थानीय मौषम संकटकाल घोषणामा आपतकालिन अवस्थामा बाहेक अन्य अवस्थामा बाहिर निस्केर घुमफिर गर्नमा रोक लगाइएको छ । न्युयोर्क सिटीमा २२ इन्चसम्म हिमपात हुने र सिटीभर हिमआँधीको जस्तै अवस्था हुने मौषमविदहरुको चेतावनी रहेको छ ।
मेयर बिल ब्लाजिओले यो हिमआँधीले भारी हिमपात ल्याउने भएकाले कुनै गल्ती नगर्न चेतावनी दिएका छन् । साथै हिमपातका कारण यात्रा खतरनाक हुने उनको भनाई छ । न्युयोर्कबासीहरुलाई घरभित्रै बस्न उनले सुझाव दिएका छन् । साथै आपतकालिन गाडीहरुका लागि बाटो खुला राख्न र हिउँ सोहोर्ने गाडीलाई राम्रोसँग काम गर्ने वातावरण बनाउन ब्लाजिओले आग्रह गरेका छन् ।
यो आदेश आज विहान ६ बजेदेखि लागु भएको छ । सोमबार विहान १० बजेदेखि हरेकघण्टा न्युयोर्क सिटीमा २ देखि ४ इन्चसम्म हिमपात हुने अनुमान गरिएको छ । न्युयोर्क सिटीमा प्रतिघण्टा ५० माइलसम्म हुरी चल्ने अनुमान गरिएको छ ।
सार्वजनिक यातायातमा काम गर्ने कामदारहरु, फस्ट रेस्पोण्डरहरु, हेल्थकेयर र होमकेयर कामदारहरु, प्रहरी अधिकारीहरु, शान्ति अधिकारीहरु, अत्यावश्यक सिटीको सेवामा संलग्न कामदारहरुलाई भने छुट दिइएको छ ।
त्यस्तै खाना, औषधी र इन्धन डेलिभरी गर्नेहरु, संचारमाध्यमहरु, होटलका कामदारहरु, होमलेस सेल्टरमा काम गर्नेहरु र आउटरिच कामदारहरु, आपतकालिन मर्मतमा खट्ने युटिलिटी कामदारहरुलाई छुट दिइएको छ ।
फार्मेसी, ग्रोसरी स्टोर, खाना तथा बेभरेज स्टोर, कन्भिनियन्स स्टोर, ग्यास स्टेशन, लण्ड्री, होटल, रेष्टुरेण्ट, बार र हार्डवेयर स्टोरमा काम गर्नेहरु, औषधी उपचार वा औषधीका सामाग्री किन्न निस्केकाहरु, कार्यस्थलबाट कामदारलाई लिन लैजाने प्रयोग हुने गाडीहरुलाई पनि छुट दिइएको छ ।
त्यो बाहेक अरु सबैलाई बाहिर निस्कन प्रतिबन्ध लगाइएको छ ।