टेक्सासमा ५ लाख ७ हजार डलरमा नेपाली सामुदायीक भवन खरिद प्रक्रिया अन्तिम चरणमा
प्रकाशित मिति : माघ ९, २०७७ शुक्रबार
– शेर केसी
टेक्सासको राजधानी अष्टिनमा बसोवास गर्ने नेपालीहरुको आफ्नै सामुदायीक भवन बनाउने सपना पुरा हुन लागेको छ । ग्रेटर अष्टिन नेपाली सोसाइटी र यस अन्तर्गत रहेको नेपाली सामदायीक केन्द्र निर्माण समितिको पहलमा फेब्रअरी पहिलो साता सामुदायीक भवन खरिद प्रक्रिया सकिने ग्रेटर अष्टिन नेपाली सोसाइटीका अध्यक्ष भोजराज भट्टले जानकारी दिनुभयो ।
फुल्गरभिल, राउण्ड रक र हटोको कर्नरमा हाइवे १३० संगै रहेको २ दशमलव ६ एकड जमिनमा रहेको भवन खरिद गरेर नेपाली सामुदायीक केन्द्र बनाउने कार्य अन्तिम चरणमा रहेको अध्यक्ष भट्टले बताउनुभयो । उहाँका अनुसार सो भवनलाई ५ लाख ७ हजार डलरमा खरिद गर्ने सहमति भएको छ ।
हाल सम्म सामुदायीक भवनका लागी संकलित रकम खरिद मूल्य भन्दा कम रहेको र यही महिनाको अन्त्य सम्म रकम जम्मा गरि सक्नपर्ने भएकोले सके संस्थाको ट्रष्टी बनेर नसके सक्दो सहयोग गर्न अष्टिनवासी नेपाली समुदायमा अपिल गरिएको पनि भट्टले बताउनुभयो । साथै पहिले सहयोगको कबोल गरेका व्यक्तिहरुले आफ्नो रकम यही जनवरी महिनाको अन्त्य सम्म बुझाई सक्न पनि अनुरोध गर्नुभयो ।
नेपालीहरुको बाक्लो बसोवास भएका अमेरिकाका अन्य शहरहरुका नेपाली सामदायीक भवन छन् । नेपालीहरुका बिभिन्न कार्यक्रम हालसम्म भाडामा गर्दै आइएकोमा अव आफ्नै भवन भएपछि कार्यक्रम आयोजनाका लागी पनि सहज हुने अपेक्षा गरिएको छ ।
ग्रेटर अष्टिन नेपाली सामुदायीक केन्द्र निर्माण समितिले सामाजिक संजालमार्फत एक बिज्ञप्ती जारी गरेर भवन खरिद प्रक्रिया र संकलित आर्थिक विवरण पनि सार्बजनिक गरेको छ ।