लन्डनमा नेपाली सेफ हत्याका अभियुक्त जमानतमा रिहा, पोस्टमार्टमबाट मृत्युको कारण अस्पष्ट
प्रकाशित मिति : माघ १, २०७७ बिहीबार
❒ लन्डनमा नेपाली सेफ विक्रम केसीको हत्याका अभियुक्त फेब्रुअरी महिनाको शुरुमा हाजिर हुने गरी जमानतमा रिहा
❒ राती कामबाट फर्किदै गर्दा आफ्नो घरदेखि २ मिनेटको दूरीमा रहेको ट्रेन स्टेशनबाहिर केसी र ती युवाबीच झगडापछि भएको कुटपिटबाट केसीको घट्नास्थलमै मृत्यु
❒ साढे १० बजेको समयमा प्रहरी घट्नास्थल पुगेको र बेहोस अवस्थामा रहेका पुरुषलाई बचाउन कोशिस गर्दागर्दै सफल नभएको प्रहरीको भनाइ
❒ खसोखासमा थप समाचारहरुका लागि यहाँ क्लीक गर्नुहोला ।
लन्डनमा गत आइतबार राती भएको एक नेपाली सेफ विक्रम केसीको हत्याका अभियुक्त जमानतमा रिहा भएका छन् ।
लन्डन इष्टकोट ट्रेन स्टेशनबाहिर सामान्य झगडापछि ज्यानै जाने गरी भएको कुटपिटमा संलग्न भएको आरोपमा पक्राउ ती २१ वर्षीय युवा जमानतमा छुटेको लण्डन मेट्रोपोलिटन प्रहरीले जनाएको छ ।
अनुसन्धानमा थप सोधपुछका लागि उनलाई फेब्रुअरी महिनाको शुरुमा हाजिर हुने गरी जमानत दिइएको प्रहरीले बताएको छ ।
आइतबार राती कामबाट फर्किदै गर्दा आफ्नो घरदेखि २ मिनेटको दूरीमा रहेको ट्रेन स्टेशनबाहिर केसी र ती युवाबीच झगडापछि भएको कुटपिटबाट केसीको घट्नास्थलमै मृत्यु भएको थियो ।
प्रहरीका अनुसार पोस्टमार्टम रिपोर्टले समेत केसीको मृत्युको कारण स्पष्ट गर्न सकेको छैन । मृत्युको कारण खोज्न अब थप परीक्षणहरु गरिनेछ ।
घटना भएको भोलिपल्टै अक्सब्रिज मोर्टुअरीमा पोस्टमार्टम गरिएको प्रहरीले बताएको छ ।
प्रहरीले अहिलेसम्म प्राप्त विवरणअनुसार गत आइतबार राती सवा १० बजे दुई पुरुषबीच इष्टकोट ट्रेन स्टेशनबाहिर झगडा भएको र एक पुरुषको मुक्का प्रहारबाट अर्का पुरुष ढलेर बेहोस बनेको बताएको छ ।
एम्बुलेन्स सर्भिसले खबर गरेपछि साढे १० बजेको समयमा प्रहरी घट्नास्थल पुगेको र बेहोस अवस्थामा रहेका पुरुषलाई बचाउन कोशिस गर्दागर्दै सफल नभएको प्रहरीको भनाइ छ ।
प्रहरीले घट्नास्थल नजिकैका पसल तथा बासिन्दालाई घट्नाको समयको सिसिटिभी फुटेज उपलब्ध गराएर अनुसन्धानमा सघाउन अपील गरेको छ ।
घट्नाका बेला सोही सडकमा गुड्ने गाडीहरु समेतलाई फुटेज भए उपलब्ध गराउन आग्रह गरिएको छ । विशेषगरी घट्नाकै समय छेउको सडकबाट पास हुने एउटा सानो, रातो रंगको कारका चालकलाई प्रहरीले सम्पर्कमा आएर जानकारी दिन अनुरोध गरेको छ ।